Adaty däl
sapaklarynyň guralyşy we geçirilişi
Bu
işde “sapak” düşünjesine, onuň görnüşlerine seredip geçmek bilen, has hem,
diňe bilimleriň we endikleriň özleşdirilmegine däl-de, okuwçylaryň
döredijilik ukyplarynyň kämilleşdirilmegine, okuwa bolan gyzyklanmanyň
ýokarlandyrylmagyna hem ýardam berýän, adaty däl sapaklaryň guralyş we
geçiriliş meselesine üns berlip geçilýär.
Sapak – döwrebap
bilim beriş ulgamynda bilim bermegiň, başarnyk bilen endigi kämilleşdirmegiň,
sazlaşykly ýola goýulmagynyň esasy serişdesi bolup hyzmat edýär.
Sapak – öwrenilýän
dersiniň esaslarynyň ähli okuwçylar tarapyndan özleşdirmegi üçin amatly
ýagdaýlary döredýän işler görnüşlerini we usullaryny ulanmak arkaly, anyk
bellenilen döwür dowamynda her bir okuwçynyň (synpyň) aýratynlygynyň hasaba
alynmagy bilen, mugallymyň köpçülikleýin akyl ýetirme ukybyna ýolbaşçylyk
etmegi netijesinde emele gelýän guramaçylykly bilim berme görnüşidir. Bilim
bermegiň synp-sapak ulgamy okuwçylaryň köpçülikleýin işe çekilmegini, okuw
işiniň aýdyň, üznüksiz bolmagyny üpjün edýär. Sapak adaty we adaty däl
görnüşinde geçirilip bilner. Adaty görnüşinde sapak geçirilende, okuwçylar
köplenç tälim bermäniň passiw obýekti bolup çykyş edýärler.
Ýöne häzirki
döwrüň mugallymlary mydama synpdaky ähli okuwçylary işjeňleşdirjek, olarda
sapaklara bolan gyzklanmany artdyrmaga ýardam berjek we, şonuň bilen bir
hatarda, berilýän maglumatlaryň tiz ýatda galmagyny,
oňa akyl ýetirilmegni we onuň özleşdirilmegini üpjün etjek, materialy
düşündirme we mugallym-okuwçy arabaglanyşygyny guramaçylykly saklabiljek bilim
berme usullarynyň goşmaça görnüşleriniň gözlegindedirler.
Sapaklaryň
gyzyklandyryjy görnüşlerini, adaty däl (beýlekilere meňzemeýän, özboluşly)
sapaklary olara mysal hökmünde getirip bolar.
Adaty däl
sapaklar – bu bilim bermegiň dürli görnüşleriniň dürli usullaryny we
tärlerini özünde jemleýän sapaklardyr. Olar okuw-terbiýeçilik işiniň
netijeliligini ýokarlandyrmak maksady bilen mugallymyň hem-de okuwçynyň
bilelikdäki döredijiligi, gözleg-agtaryş işleri, täze usullaryň
özleşdirilmegi boýunça tejribeler esasynda gurulýarlar.
Mugallymlar adaty däl görnüşinde açyk
sapak berenlerinde, sapaklar utuşly bolýarlar, sebäbi olarda oýun pursatlaryny
hem, tema bilen baglanyşykly maglumatlaryň üýtgeşik usulda berilmegini hem,
dürli köpçülikleýin we toparlaýyn işler görnüşlerinde okuwçylaryň iş bilen
meşgullygyny we işjeňligini hem görkezip bolýar.
Adaty däl
sapaklaryň görnüşleri köpdür. Pedagogiki ylmynda olaryň toparlara bölünişi
kesgitli, doly bolman, geljekde sapaklaryň täze görnüşleriniň (tipleriniň)
işlenip taýýarlanylmagy netijesinde üsti doldurylyp durular.
Aýratyn ýagdaýa
degişlilikde, adaty däl sapaklaryň şeýle görnüşlerini belläp bolýar:
1) ekskursiýa
sapaklary;
2) oýun sapaklary (hünär,
kär, rol);
3) çekişme (sapaklary,
tegelek stollar, jedeller;
4) binar sapaklary;
5) ylmy-derňew
sapaklary;
6) okuwçylaryň birek-birege
öwrediş sapaklary ;
Adaty
däl sapaklaryna taýýarlanýan mugallymlara maslahatlar:
- sapaga taýýarlanyş
döwründe hem, sapak geçirilýän wagty hem höweslendirme pursatlaryndan köp peýdalanyň;
- hiç hili
artykmaçlyklara ýol bermäň. Sapakda sazlaşykly bütewilik saklanylmalydyr,
sebäbi sazlaşyklyk – biziň döredijiligimiziň esasy maksadydyr;
-
okuwçylary
sapaga goşýan goşandyna görä höweslendiriň;
- siziň adaty däl
sapagyňyzyň üstünligi öňünden, ykjam meýilleşdirilen taýýarlyga, onuň
geçirilmeginiň görnüşleriniň we usullarynyň üstünde mazaly pikirlenip, düýpli
düşünilmegine baglydyr;
-
diňe
bilim berme, terbiýeleme we kämilleşdirme netijelerini bahalandyrmak bilen
çäklenmän, arabaglanyşyk ýagdaýyny hem, ýagny mugallym bilen okuwçynyň
aragatnaşygyndan başga-da, okuwçylaryň biri-biri bilen, şeýle hem, aýratyn işçi
toparlaryň öz aralaryndaky arabaglanyşygyny bahalandyrmak maksada laýykdyr.
Indi bolsa adaty däl sapaklaryň käbir
görnüşleriniň üstünde durup geçeliň.
Ekskursiýa
sapaklary
Ekskursiýa – okuw
işiniň gadymy görnüşi bolup, bilim berme işi okuw otagy şertlerinde däl-de, okuwçylaryň
gurşap alýan älemi duýma, oňa akyl ýetirme pursatlarynda, ýagny tebigatda,
muzeýde, şäheriň köçelerinde, seýilgählerde, önümçilik kärhänalarynda we ş.m,
ýerlerde amala aşyrylýar.
Mugallymyň etmeli
işleri:
- onuň mazmunyny,
maksadyny, meselelerini kesgitlemeli, olary okuwça ýetirmeli;
- okuwçylary
tanyşdyrjak bolýan obýektlerini ýalňyşsyz saýlamaly;
- ekskursiýa
obýektini görkezme usuly we ol baradaky geçiriljek söhbet hakda pikirlenmeli,
okuwçylary işjeň akyl ýetirmeklige çekme tärleriniň üstünde işlemeli.
Obýekt (ler)
saýlananda, mugallym ony (olary) şeýle görkezijiler (ölçütler) boýunça
bahalandyrmalydyr:
1) okuwçylar üçin
öwrenijilik babatyndaky gymmatlylygy;
2) täsirliligi;
3) abatlygy (obýektiň
häzirki wagtdaky ýagdaýy, onuň görkezilme üçin taýýarlanmagy);
4) ýerleşýän ýeri
(obýekte çenli aralyk, ulagda barmak mümkinçiligi, oňa alyp
barýan ýoluň amatlylygy).
Mugallym
ekskursiýa sapagynyň temasyny gyzykly görnüşde kesgitlemeli; görkeziljek
obýekt bilen özbaşdak tanyşmaly; ekskursiýanyň ugruny düzmeli; “gönükdiriji”
ýazgylar toplumlaryny (ekskursiýa ýolbaşçysynyň bukjasyny) taýýarlamaly (obýektiň
ady, obýekt bilen baglanyşykly taryhy waka, wakanyň bolup geçen wagty, obýektiň
gysgaça beýany (awtory, gurlan wagty, täzeden dikeldilen senesi), ýadygärligiň
goralmagy, obýekt bilen baglanyşykly gyzykly deliller, rowaýatlar).
Oýun
sapaklary
Oýun – bu berlen ýagdaýlar
şertlerinde
özüňi
belli bir tertipde alyp barmaklyk talap edilýän we kämilleşdirilýän jemgyýetçilik
tejribesiniň
täzeden
dikeldilmegine gönükdirilen hereketleriň görnüşi.
Bu hili sapaklar çagalara oýun
ýagdaýyna goşulyp, üstünligiň ýa-da şowsuzlygyň joşgunly tolgunmalaryny
başdan geçirmäge mümkinçilik döredýär. Şeýle hem, çagalar we ýetginjekler oýnuň
dowamynda iş we durmuşy aragatnaşyklary babatynda: döredijilikli başlangyjy
görkezmek, meseleleri orta atmak we olary çözmek, işi meýilleşdirmek; özbaşdak
hereket etmegi öwrenmek, işde janly bolmak, sabyrlylyk, ýoldaşlyk we hyzmatdaşlyk
duýgusy, gepleşigi alyp barmak, ylalaşykly bolmak ýaly zerur bolan ukyplary
kämilleşdirýärler.
Oýun – bu ýaşlaryň önümçilik we jegyýetçilik
durmuşyna bolan özboluşly taýýynlygydyr, durmuşy rollary özüňe deňäp görmekdir.
Oýnuň adamyň ösüşinde ýerine ýetirýän wezipelerine aşakdakylary degişli edip
bolar:
- güýmenje
(begendirmek,
hezil bermek, ruhlandyrmak, gyzyklandyrma döretmek),
- aragatnaşykda döreýän jedel etme sungatyny
özleşdirmek,
- başarjaňlygyň
beýleki görnüşlerinde ýüze çykýan dürli kynçylyklardan baş alyp çykmak,
- özüňi kadaly alyp
barmakda döreýän gyşarmalary aýan etmek, oýun döwründe öz ýagdaýyňy aňmak,
- ähli adamlar üçin
umumy medeni-durmuşy gymmatlyklary özleşdirmek,
- jemgyýetçilik
gatnaşyklary ulgamyna goşulmak, adamlar arsynda ýaşamagyň umumy kadalaryny
özleşdirmek.
Okuw oýnunyň
görnüşine baglylykda gatnaşyjylaryň dürli häsiýetdäki rollary ulanylyp bilner. Okuwda
oýun tehnologiýasynyň eýeleýän orny we ýerine ýetirýän wezipesi, oýun elementleriniň
(parçalarynyň) okuw bilen utgaşdyrylmagy köp halatda mugallymyň oýnuň
görnüşine we onuň üsti bilen gazanyljak netijelere düşünmegine bagly bolýar.
Şeýlelikde
oýunlaryň şeýle toparlaryny tapawutlandyryp bolar:
Hünär, kär
bilen baglanyşykly oýun
Hünär, kär
bilen baglanyşykly oýun ýokary synp okuwçylaryny okatmaklygyň uly umyt
bildirýän usuly bolup çykyş edýär. Okuw dowamynda iş bilen baglanyşykly
oýunlaryň öýkünme we rollar boýunça diýen ýaly görnüşlerinden peýdalanylýar.
1. Öýkünme- kimdir
birine, nämedir bir zada meňzejek bolma, oňa öýkünip gaýtalama. Sapaklarda
haýsy hem bolsa bir guramanyň, kärhananyň ýa-da onuň bölüminiň işi, hereketi,
meselem, ýaşlar guramasynyň maslahaty we ş.m. suratlandyrylýar. Bir wakany,
bell bir adamlaryň işini (iş bilen baglanyşykly ýygnagy, söhbetdeşlik
geçirmekligi, ündew,
jedelleri alyp barmaklygy, täze habarlar bilen tanyş etmekligi) görkezip bolar.
2. Rollar
boýunça oýunda gatnaşyjylar tarapyndan uly, wezipeli adamlaryň
rollaryny ýa-da ýörite döredilen rollar ýerine ýetirilýär we ýörite döredilýän
oýun ýagdaýynda adamlaryň işi hem-de olaryň arasyndaky gatnaşyklary görkezilip
gaýtalanýar.
Çekişme
(diskussiýa) sapaklary
Çekişme sapaklary
– bu haýsy hem bolsa bir sorag, mesele boýunça, belli bir düzgünlere
laýyklykda, çekişmäniň ähli ýa-da birnäçe gatnaşyjylarynyň gatnaşmagynda
geçirilýän pikir alyşmadyr. Biri-biriniň üstüni doldurýan gepleşigiň ýa-da
pikir alyşmanyň-jedeliň, dürli nukdaýnazarlaryň utgaşmasy, dünýägaraýyşlaryň çaknyşygy - onuň aýratyn häsiýetlerine
degişli bolýarlar.
Şonda gatnaşyjylar
hökmünde iki tarapyň wekilleri
bolsa gowy, meselem, ýaşlar guramasynyň wekilleri bilen okuwçylar öz aralaryndaky
çekişmeleri.
Ähmiýetli
meseleler bilen bir hatarda, tertip ýa-da topar gatnaşyjylarynyň özara
gatnaşyklary bilen baglanyşykly soraglar çekişmegiň temasy bolup biler.
Sapakda çekişme
usulyndan peýdalanmak üçin toparda, synpda tertibiň ýokary derejede bolmagy
talap edilýär. Adatça ony uly synplarda ulanmak netijelidir.
Bu usul diňe
bilimleri berkitmek bilen çäklenmän, jedelleşmek, öz pikiriňi subut
etmek, ony goramak we ahyryna
çenli durmak başarnygyny ösdürmäge, sabyrlylyk duýgusyny kämilleşdirmäge mümkinçilik
döredýär.
Binar sapaklary
Binar sapaklary
dersara baglanyşyga, sapaklaryň birleşdirilmegine esaslanyp, dürli pedagogiki ylymlarynyň
tehnologiýa garyndylarynyň ulanylmagyny göz öňüne tutýar. Okuwçylaryň
dünýägaraýyşlaryny emele getirmekde, olaryň düşünjelrini kämilleşdirmekde
wajyp tapgyr bolup çykyş edýär.
Sapagy bir ýa-da
birnäçe hünärmen ders mugallymlary alyp barýar. Ilki binar sapagynyň esasy
bolup çykyş etjek, umumy temanyň kesgitlemek üçin iki dersiň okuw temasy seljerilýär.
Meselem, umumy bilim berýän orta mekdeplerinde şeýle dersleri birikdirip,
aşakdaky temalary almak bolar: geografiýa we Türkmenistanyň taryhy – sapagyň
temasy “Yer titreme. Matam güni”; geografiýa we ekologiýa – sapagyň temasy
“Türkmenistanyň klimatiki guşaklary we organizmleriň uýgunlaşmagy”; fizika,
ekologiýa – sapagyň temasy “Temperaturanyň we ýeliň daşky gurşawa edýän
täsiri”; matematika we informatika – sapagyň temasy “Silindriň üst meýdanynyň
we göwrüminiň hasaplanyp çykarylmagy”, iňlis dili we bedenterbiýe – sapagyň
temasy “Spotr we sagdyn durmuş”, “Mekdep olimpiýa oýunlary” ; dünýä medeniýeti
we geofrafiýa – sapagyň temasy “Halk senediniň geografiýasy” we ş.m.
Ders mugallymlary
bilelikde sapagyň gidişini jikme-jik meýilnamalaşdyrýarlar. Onda her biriniň
roly, etmeli işi aýdyň kesgitlenilen bolmaly. Binar sapagynyň dürli derslerde
gaýtalanýan däl-de, biri-biriniň üstüni doldurýan böleklerden ybarat
bolýandygyny bilmek zerur. Okuwçylara öwrenilýän temasynyň iki ýa-da birnäçe
derslerde ulanmaga, bilimlerinden, başarnyklaryndan döredijilikli peýdalanmaga,
özara baglanyşyk esasynda düşnükli bolan meseleleri çözmäge, öz zähmetiniň
netijelerini görüp, sapakdan lezzet almaga mümkinçilik döretjek ýumuşlar
işlenip düzülse has gowy bolar.
Binar sapagy adaty däl sapaklarynyň bir
görnüşi bolmak bilen, köp meseleleriň çözülmegine ýardam berýär, meselem, mugallymlaryň
hyzmatdaşlygyny ösdürýä; okuwçylaryň we mugallymlaryň gözýetimini giňeldýär; dürli
ugurlar boýunça bilimleri birleşdirýär; okuwçylara dersleriň arabaglanyşygyny,
dünýäniň bitewiligini görkezýär; seljerme we oýlap tapyjylyk ukybyny
ösdürýär; okuwçylara döredijilik ýagdaýlarynda çözgüdi agtaryp tapmaga
mümkinçilik döredýär. Binar sapaklar ulgamynda kompýuter tehnologiýasynyň ulanylmagy
sapaklaryň netijeliligini we okuwçylaryň kompýuter sowatlylyk derejesini
ýokarlandyrýar.
Binar sapagy
meýilnamalaşdyrylanda döreýän kynçylyklar:
1) binar sapagynyň
geçirilişi ylmy taýdan oňat işlenip taýýarlanylmadyk. Mugallymlar öz
döredijiligine daýanyp hereket etmeli bolýarlar.
2) uzak möhletli
taýýarlygy talap edýärler (şonuň üçin olary tiz-tiz geçirip bolmaýar),
mugallymlar arasynda psihologiki we usulyýet ylalaşyjylygynyň bolmagy hökmany
şert bolup çykyş edýär.
3) guramaçylyk
bilen baglanyşykly soraglary deň getirmeklik kynçylyk döredýär- sapak rejesine
dogry getirmek, mugallymlaryň zähmetini tölemek soragyny çözmek.
4) bu sapakda
okuwçynyň haýsy ders boýunça bahalandyrylandygy baradaky soragda aýdyňlyk ýok.
Derňew sapaklary
Derňew işi we
derňew sapagy düşünjelerini bir hatarda goýmaklyk nädogrydyr. Derňew işi örän
giň düşünjäni öz içine alyp, wagt çägine eýe bolmaýar diýsek-de, ýalňyş bolmaz.
Bu öňünden belli bolmaýan netijeli derňew-barlaglardyr. Derňew sapagy bolsa okuwçylaryň
we mugallymyň ylym çäginde derňeme häsiýetine eýe bolan esasy döwürleriniň
bolmagynda, sapagyň wagty bilen çäklenen, okuwçylar tarpyndan (mugallymyň
goldamagy bilen) döredijilik, derňew meselesiniň (ýöne okuwçylar üçin däl-de,
mugallym üçin öňünden belli bolan) çözgüdi agtaryp tapylýan bilelikdäki işidir.
Bu işde berlen meselä degişli bolan taglymatlaryň gaýtalanmagy,
derňew işi üçin gerek bolan gurallardan dürs peýdalanmaklyk, gazanylan
netijeleri işläp
taýýarlamaklyk, ony seljermeklik we umumylaşdyrmaklyk, öz netijelerini
çykarmaklyk talap edilýär. Islendik sapakdan derňew sapagyny edip bolmaz. Bu
hili sapak berk taýýarlygy talap edýär. Okuwçylar ylym taýdan täze bilimleri
almaklyga taýýar bolan ýagdaýynda bolsa derňew sapagyny geçirip bolar. Umuman,
derňew sapagy aşakdakylardan ybarat: okuwçylaryň öňünde mesele goýulýar we olar
özbaşdak ýa-da mugallymyň gatnaşmagynda bu meseläniň çözgüdiniň ýollaryny,
usullaryny derňemelidirler, ýagny ylmy çaklama çykarmaly, onuň hakykylygynyň barlama usullaryny kesgitlemeli we ara
alyp maslahatlaşmaly, delillendirmeli, tejribe geçirmeli, synlamaly, netijelerini seljermeli, pikir ýöretmeli, subut etmeli. Meselem, muňa kadalaryň,
kanunlaryň, formulalaryň, teoremalaryň özbaşdak “açyşlaryna” degişli bolan
meseleler, kanunyň, formulanyň özbaşdak çykarylmagy, subut etme usullaryny
tapmaklyk degişli. Özbaşdak synanyşmak we ýalňyşmak, dürli gurallary ulanmak,
mümkin bolan formulalardan we amallardan peýdalanyp görmek netijesinde gazanylan
bilimler okuwçynyň ýadynda gowy galar.
Sapagyň bu
görnüşinde mugallym derňew gözleginiň guramaçysy hökmünde çykyş eder. Meseläni
orta atmak bilen mugallym onuň çözgüdini ugurlaryny aýan etmeli, okuwçylar
bilen birlikde pikir ýöretmeli, çaklamasyny aýtmaly, olary okuwçylar bilen bile
ara alyp maslahatlaşmaly, garşy çykmalary puja çykarmaly, hakykylygy subut etmeli. Şeýlelikde ol ýetginjeklere
ylmy düşünjeleriň yoluny görkezer, hakykylyga tarap pikiriň hereketini
yzarlamagy mejbur eder.
Derňew sapagynyň
gurluşynda hereketiň şeýle yzygiderliligini tapawutlandyryp bolýar:
1) bilimleri
gaytalap berkitmek;
2) delillendirmek;
3) mesele
bolýan ýagdaýy ýüze çykarmak;
4) derňelýän meseläni
orta atmak;
5) derňelýän
temany kesgitlemek;
6) derňewiň
maksatlaryny anyklamak;
7) ylmy
çaklamany maslahata goýmak;
8) ylmy
çaklamany barlamak (tejribe, laborator işini geçirmek, edebiýaty okamak, pikir
alyşmak, okuw filmlerinden parça görmek we ş.m.);
9) alnan
maglumatlary düşündirmek;
10) derňew işleriniň
netijelerini jemlemek;
11) okuw işinde täze
bilimlerden peýdalanmak;
12) sapagy jemlemek;
13) öý işini
tabşyrmak.
Derňew üçin
okuwça hödürlenýän mesele onuň ukybyna, aňlylygyna görä bolmalydyr. Mugallym okuwçynyň
meseläni çözmekde kynçylyk çekýändigini aňsa, kynçylyk derejesini peseltmek
üçin goşmaça maglumatlary girizmelidir.
Derňew sapaklary ýaşlarda täze pikirleri döretmäge, ylmy gözleg işlerini alyp
barmaga, sapak arabaglanyşygyny ulanyp başarmaga we geljekde ýurdumyzyň
ylmynyň, tehnikasynyň, medeniýetiniň ösüşine öz goşandyny goşmaga
mümkinçilikleri döredýär.
Okuwçylaryň
birek-birege öwrediş sapaklary
Islendik
mugallym bir sapagyň dowamynda her bir okuwçyny geçilen temalar boýunça soramak
zerurlygyna duçar bolýar, emma muny gazanýan mugallym azdyr. Bar bolan sorama
usullary bu meseläni soňuna çenli çözüp bilmeýärler, sebäbi olarda okuwçylaryň
barysy soralan ýagdaýynda, soraglaryň çäkli sanyndan peýdalanylýar ýa-da giň
soraglar toplumy ulanylan ýagdaýynda bolsa, soralýan okuwçylaryň sany az
bolýar. Özara barlagyň we birek birege öwredişiň guramaçylygynyň dürli
usullarynyň öwrenilmegi netijesinde aragatnaşyk sapaklary diýip atlandyryp
bolýan sapaklaryň usulyýetine seredip geçeliň.
Bu
sapaklarda her bir okuwçy temany öz partadaşy bilen öwrenmeli. Okuwçylar biri-birini
barlap, okuw kitabyny okarlar, soraglara jogap bereler, berlen meseleler
çözgütlerini seljererler. Ilkinji bolup taýýar bolan jübüdi mugallymyň özi
barlar. Şondan soň şolaryň içinden beýleki okuwçylaryň bilimlerini barlamak
üçin kömekçileri saýlar.
Okuwçylaryň
birek-birege öwrediş sapaklarynyň usulyýeti:
1) sapak
taýýarlylygy we işleýiş tizligi boýunça deňräk gelýän okuwçylaryň bir partada
oturdylmagy bilen başlanýar;
2) şondan soň
mugallym sapagyň geçiriliş usuly barada aýdýar we tema öwrenilýän wagtynda
jogap hökman berilmeli soraglar hem-de goşmaça ýumuşlar (tagtada ýa-da
proýektoryň üsti bilen) bilen tanyşdyrýar; mugallym sapakda edilmeli işleriň
tertibi barada görkezmeleri okuwçylar üçin taýýarlasa (meselem, yazgyly
plakat), örän gowy bolar. Görkezme şeýle görnüşde bolup biler:
-
okuw
kitabynyň berlen ýumşuny oka;
-
tagtada
görkezilen soraglara jogap taýýarla;
-
partadaşyňa
taýýarlanmaga kömek ber;
-
goňşyňyň
ähli soraglaryna jogap ber we onuň şu soraglara berýän jogaplaryny diňle,
ýalňyşlary bolsa – düzet;
-
mugallyma
öz taýýarlygyň we goňşyň taýýarlygy barada habar ber.
3) okuwçylar
işläp başlarlar. Şol wagt mugallym kimiň nämä meşgul bolýandygyny görmek we
zerur bolan kömegi bermek üçin synpda aýlanyp ýörmeli;
4) ilkinji
bolup taýýar bolan okuwçylar mugallyma jogap berýärler;
5) mugallym
şol okuwçylaryň içinde gowy jogap berenini kömekçi edip belleýär we olaryň kimi
barmalydygyny belleýär;
6) kömekçilere
oňat jogap beren okuwçylar hem kömekçi bolup, mugallymyň görkezen
okuwçylaryndan sorap bilerler, erbet jogap beren okuwçylar bolsa, täzeden
taýýarlanyp, gaýtadan jogap bererler;
7) işinden
boşan okuwçylar mugallymyň öňünden taýýarlap goýan gomaça ýumuşly ýazmaçlaryny
alyp, olaryň üstünde işläp bilerler.
Okuwçylaryň
birek-birege öwrediş sapaklary okuwçylaryň özbaşdaklygyny, alçaklygyny,
jogapkäligini ösdürmek üçin amatly, ýöne açyk sapak geçirmeklik üçin dogry
gelmeýän sapakdyr.
Kerimowa
Reýma
A.S.Puşkin
adyndaky umumy orta bilim berýän bilelikdäki
türkmen-rus mekdebiniň türkmen dili mugallymy
Оставьте свой комментарий
Авторизуйтесь, чтобы задавать вопросы.