Эрик Батуевлэсь чеберлыко гожтосъёссэ нылпи
садын но покчи классъёсын кутон: преемственностез чаклан.
Михайлова Зоя
Демьяновна,
Татарстан Республикаысь
Агрыз ёросысь
Кучуково шоръёзо
школаысь
дошкольной группаын визьнодась.
Туннэ
мон тодматыны малпасько чеберлыко
гожтосъёсты нылпи садын но покчи классъёсын дышетон сярысь, Эрик Батуевлэсь
чеберлыко гожтосъёссэ нылпи садын но покчи классъёсын кутон: преемственностез
чаклан ужпумез возьматыса.
Пичиысен
книгаен эшъяськон мылкыд пычатон понна, котькуд
нылпилэсь вераськонзэ паськытатон но кылосбурзэ узырмытон вылысь, ас
кылдэ вунэтонтэм понна, ми нылпи садамы портэм амалъёсты уже кутиськом.
Татарстан Элькунын улыса но,удмурт кылмес но,зуч кылэз но, бигерзэ но
пиналъёсмылы тодматиськом. Калык сямъёсты но йылолъёсты чакласа, кырзанъёс но
эктонъёс пыр, нылпиосты дышетиськом анай кылзэс гажаны. Палэнэ ум кельтиське
поэтъёслэн но писательёслэн ужъёсынызы тодматсконэз. Чеберлыко литератураез
анай кылын лыдзыса, пиналъёс кыллэсь аспортэмлыксэ валаны дышетско. Веросъёс но
кылбуръёс пыр тыршиськом нылпиослэсь кылзэс волятыны но узырмытыны, геройёслэсь
сямъёссэс валаны, ас вордскем шаердэ но калыктэ гажан, историез дунъян мылкыд
пычатиськом.
Кылъёсты дышетон мынэ портэм ужрадъёс пыр. Нылпиослэсь вераськон кылзэс волятон понна, занятиосамы
кутиськом кылбуръёсты но веросъёсты. Соос нылпиослэсь кылосбурзэс паськытато
но узырмыто. Туж бадзым юрттэт сётэ милемлы «Вуюись» хрестоматия. Отысь
шедьтыны луэ портэм авторъёслэсь ужъёссэс. Нылпиосмес тодматиськом
визькылъёсын, мадиськонъёсын, выжыкылъёсын, лэчыт веранъёсын,
исаськонъёсын,лыдъяськонъёсын.
Пиналъёс
мылысь-кыдысь дышето кылбуръёсты, кырзанъёсты. Собере быгатэммес возьматиськом
анай-атайёс азьын, соосты куное отьыса. Асьмеос мыниськом школае, соосын чош
огазьын ужрадэ пыриськиськом. Покчи классъёсын дышетскисьёс асьсэос но ми доры
шумпотыса лыкто. Тазьы валче ужаса, ог-огенымы тодматскыса, нылпиослы капчи луэ
школае дышетскыны пырыкузы.
Берло дыре арлы быдэ
пыриськиськом Татарстан Элькунысь удмурт культуралэн ортчытэмез улсын
«Мудорвай» («Росточек») конкурсэ. Отын пиналъёсмы возьмато котыр ласянь
быгатонлыксэс. Экто но, кырзало но, удмурт кылын кылбуръёс верало, удмурт
выжыкылъя суред лэсьто.Та конкурсэ пыриськыны быгато нылпи садэ ветлись
пиналъёс но покчи классъёсын дышетскисьёс но.
Арлы быдэ, анай
кылмес данъяса, удмурт кыллы сизем декадае пыриськиськом. Та ужрадэз
ортчытиськом клубын нылпи садэн, школаен , библиотекаен но «Инвис» калык
ансамбле ветлись песянайёсын чошен.
Таче ужрадъёс юртто
нылпиослы котыр ласянь шаплы луыны, нош отчы пыриськон понна, туж трос
кылбуръёсты, выжыкылъёсты эскериськом. Соос полысь бырйиськом кельшисьёссэ,
пиналъёслы дышетыны капчи мед луоз шуыса, лыдзиськыны мылкыдзэс жутон вылысь.Удмурт
калык выжыкылъёсын тодматыса, нылпиослэсь суредаськыны быгатолыксэс но
вераськон кылзэс волятиськом.
Эрик Батуевлэсь
чеберлыко гожтосъёссэ эскерыса, выль малпан кылдиз, азьланяз ужрадъёсамы кутыны
луоз солэсь но кылбуръёссэ. Кылсярысь, «Шунды» кылбурзэ лыдзыса, мылкыд ик
жутске.
Шунды
Вазь чукна
Сайкась инме,
Турнике сямен,
Горд шунды каллен
жутске,
Зырдаса пумен.
Зигарыз кызьы тырме?-
Жук, лэся,
Уно сие.
«Бубыли» кылбурзэ
шудонын кутыны луоз.
Бубыли
Бубыли, бубыли,
Ог-огмес уём али!
Мон куто тонэ, лэзё,
Собере бызё, бызё…
«Висись» нимо
кылбурез кельше мунёен шудисьёслы.
Висись
Мунёе туннэ висе-
Со толон вуэ усем.
Шобретэн мон бинялто,
«Жог юрттисьёсты»
отё.
Нош отын ужа Вани.
Врач луоз эше-Мани.
Мунёлы укол пуктоз,
Висисе сэрыт бурмоз.
Эрик Батуевлэн
чеберлыко гожтосъёсыз портэм арлыдо муртъёслы тупа. Куд-огез вуттэ шудо нылпи
дуннее, нош куд-огез мур малпаськонэ уськытэ. Егит гожъясьчилэн кылбуръёсыз,
котырысь улонэн тодмато, вордскем шаерез гажаны дышето.Соин ик, соосты луэ
кутыны нылпи садын но, покчи классъёсын но, шор ёзо школаын но.
Оставьте свой комментарий
Авторизуйтесь, чтобы задавать вопросы.