Сценарий к юбилею Кадрии

                       Мынълап яша юреклерде, Кадрия.

Кирис кеги.

Аста акырын анъ шалынады, Кадрияга багысланган видеоролик. Аудио запись: К.Бариев "Кадрия"

1-нши  юритуьвши.

Бек аз яшады шоьлимиздинъ Шолпан юлдызы-Кадрия. Оькинишке бакты бизге онынъ барлыгын коьп коьрди эм замансыз яшав йолын уьзди. Айындырык ярыгындай яркылдады да-соьнди.

2-нши юритуьвши.

Эгер ол арамызда болган болса бу куьнлерде бизи мен бирге оьзининъ тувган куьнин куьезленип белгилеек эди. Ама не этерсинъ? Яшав-сондай да аявсыз авыр суслы зат. Кимди аькетип, кимди калдыраягын биревден де сорамайды.

1-нши  юритуьвши.

Кадрия Оразбай кызы бизим ногай шаьйирликте, акыйкатлай да, "янъы юлдыз" болып тувды. Коьзимиз уьйренген ислерге, кулагымыз уьйренген сазларга, акылымыз уьйренген ойларга шаьйир кыз янъы, бизди сейирсинткен карасын таслайды, анъсыздан коьз алдымызда янъы акыйкатлык тувдырады, энъ терен сезимлерди козгайды, сесининъ эм ойынынъ куьши мен оьзине ызлаттырады эм ыйнандырады.

2-нши юритуьвши.

"Янъы юлдыз" болув-сыйлы эм оьрметли, соны ман  да бирге яваплы ис.

Кадрия соьз-шынты шаьйирдинъ бас савыты экенин, тек ол савыттынъ сыйын кетирмес уьшин кулланувда саклык эм яваплык керек экенин аьруьв анълайды.

1-нши  юритуьвши.

Кадрия оьз ятлавлары ман ногай аьдемин ашыктан-ашык соьйлесуьвге шакыргысы келди, халкы ман бир тилде соьйлегиси келгенин анълатты. Халкы да ога ыйнанды, сенди, суьйди, юрегин ашты. Шаьйирдинъ куваныш эм разылык сезимлери халкына онынъ шыгармаларында коьринеди.

 "Ногайым" (Давлетова И. 6 класс)

2-нши юритуьвши.

Кадриядынъ шыгармаларынынъ тематикасы айлак бай. Кайсы шыгармасын окысанъ да , онда шоьл кызынынъ каты кылыгы, халкы уьшин яны аврувы, яшавда болатаган аьр-бир затка шеккидей шегип каравы аян коьринеди. Онынъ аьр-бир ятлав сыдырасында, соьзинде кайдай терен, янынъа ювык ойды сезесинъ, оны ман бирге мунъаясынъ, бирге куванасынъ.

"Халкыма" (Махмудова 4 кл.)

1-нши  юритуьвши.

 Шаьйирдинъ юрегине ювык еткен янларына багыслаган ятлавлары да коьп. Солардынъ ишинде суьйген энеси  Бийке акында, онынъ аьвелги ногайдынъ яшавы акында хабары, энеси йырлайтаган "Боз йигит" дестаны дайымга юрегине синъген.

Энесининъ ярык келбети, ога йылы терен суьйими "Энеме" деген ятлавында ашык сезиледи.

"Энеме" (Аджиева С.: кл.)

 2-нши юритуьвши.

Атасына багыслаган ятлавында шаьйир оьзининъ дуныяга кыз болып энгенине атасынынъ алдында куьнаьлидей санап, оны увыл тувмай кыз тувганына оькинме деп увылдан да артык болаягына ыйнандырады

 "Атама" (Исмаилова М . 7кл.)

1-нши  юритуьвши.

 Юрегине аьзиз анасына багыслаган ятлавларында шаьйир кыздынъ исси терен суьйими анасына, онынъ ярык келбети дайым юрегининъ басында экенин, соны ман бирге анасынынъ картлыгын сезгенде юрегининъ куьюви, аврувы, боьри болып улувы акында хабарлайды.

Йыр "Аьзиз анам"

2-нши юритуьвши.

Уьйкен суьйим мен язылган синълисине багысланган ятлавы. Шаьйир авыр куьнде аяган, кыйынлыкта таянган, янына энъ де ювык аьдемин, тирелмеге тиревин, маьлиегин  синълиси Софияды излейди.

 "Синълиме" (Канлыбаева Э. 7 кл.)

1-нши  юритуьвши.

Шаьйирлик йолына туьскен инсан тувган ерининъ табиаты ман сукланмай, ата юртынынъ тезек ийисин ят элде сагынмай, ана тилининъ теренлигине суьйинмей, оьз халкынынъ яратувшылыгын исси суьймей, замандасларынынъ янын кыйнаган сезимлерин, сога коьре юрегинде тувган ойларын, яшавга тиккен коьз каравын оьз шыгармаларында коьрсетпей болмайды.

 "Тилим меним" (9 кл.),  

"Куьшли еллер эседилер шоьлимде" (Давлетова С. 7 кл.)

2-нши юритуьвши.

Кадриядынъ суьюв акында толкынлы сыдыралары аьр хатын кыздынъ янына дем болып синъедилер, юзине юмсак йылмаюв, наьсип шувакларын эндиредилер, бир вакытка болса да, таьвелсимес куллыкларды таслаттырып, сезимлер толкынында юздиреди.

1-нши  юритуьвши.

Шаьйир кыздынъ суьйим лирикасында бир тыныстан айтылынган кайгылы куьрсинуьви йырга айланган шыгармалары да бар.

 Йыр "Рахатлык йок юрегимде"

2-нши юритуьвши.

Кайдай йылы,  юмсак, терен сезимлер бийлеген шаьйирди деп ойлайсынъ "Ахматтынъ шипийлери" деген балаларга язылган шыгармасын окыганда. Аьр-бир сыдырада балалыктынъ яркын шагы шаьйир кыздынъ юрегин бийлегени коьринеди.

"Ахматтынъ шипийлери" ( Махмудова А. 5 кл.)

1-нши  юритуьвши.

Авыр кавга йыллары. Кыйынлык коьрген Элимиз эм кишкей ногай шоьлимиз. Яслай ялгыз калган яс хатынлардынъ, оьксиз калган балалардынъ бактылары шаьйирге тынышлык бермейди, ялын болып куьйдиреди, онынъ юрегин сосы ойлар. Куйылды ак юректен отлы сыдыралар эм шаьйир юрегимнинъ бийкелери ногай хатынлар-сизге деп "Элбийке" деген дестанын шыгарады.

2-нши юритуьвши.

Кадрия ер юзинде тынышлык йок экенин сезгендей "Энди кавга болмасын, парахатлык бийлесин ана юрегин баласынынъ бактысы уьшин, элде табылар куьш сол тынышлыкты сакларга" деп сендиреди.

Дестан "Элбийке"(Янибекова М., Темиров Т.)

1-нши  юритуьвши.

Кырк йылдан артып бараятыр шаьйир кызымыздынъ йоклыгына. Ол оьзи янымызда болмаса да, онынъ ялынлы юрегининъ кайнавы- ятлавларында. Шекленмеймиз, эгер бу куьнлерде онынъ юреги согып турган болса ногайды бирлестирмеге шакырып, онынъ эткен тийиссиз затларына яны куьйип тураяк эди.

"Йигитлер йыры" (Джуманбетов Ш. 10 кл.)

2-нши юритуьвши.

Кадриядынъ "Ата юртым" деген йырга айланган шыгармасы баьри ногай халктынъ, оьсип келеятырган яслардынъ канына синъип, тувган ногай шоьллиги уьшин яны авырып, ногай атын йогары юргистип," мен ногай ман" деп оьктемсип  айтып юреегине сенемиз эм баьринъизди де сол йырды йырламага шакырамыз.

Йыр "Ата юртым"

1-нши  юритуьвши

Буьгуьн биз шаьйир кызымыздынъ бай яратувшылыгынынъ бир кишкей кесегин алып коьрсетпеге шалыстык" эм шаьйирдинъ:

Сокпагымдай яшавда ыз калдырсам.

Куванышка мен дайым да толарман.

Аьр соьзим мен халкка наьсип мен ашсам

Мен оьзимди наьсипли деп санарман.

2-нши юритуьвши.

Деген сыдыраларын окып, ногай халкынынъ юрегининъ туьбиннен шыккан соьзлер мен явапламага суьемиз:

Баьри сенинъ язганынъ занъырар йырлар болып.

Шоьл уьстинде сенинъ атынъ яркырар юлдыз болып.

                                                Н. Муталапова

1-нши  юритуьвши

Туьнъилменъиз

Юлдызымыз соьнди деп,

Баьтир оьлсе

Данъкын саклар дуныя

Ногайымнынъ

Сыйлы кызы сол ды деп,

Юреклерде

Мынълап яшар Кадрия.

                                   (Куьнбийке Сангишиева)

2-нши юритуьвши.

Разымыз сага, шоьл кызы Кадрия, сен аьли де бизим юреклерде тирисинъ, сени биз ашык авада, куслардынъ сарнавларында, табиаттынъ тынысында сеземиз эм буьгуьн сенинъ алдынъда бас ийип, оьктемсип юреклерде мынълап яша, Кадрия деп айтамыз.