Сыныпта жағымды хал ахуал қалыптастыру

ТРЕНИНГ САБАҚ

Тақырыбы: Сыныпта жағымды хал ахуал қалыптастыру.

Мақсаты:    Оқушылардың арасында жағымды қарым-қатынас орнату, бір-бірін сыйлауға, адал дос болуға  үйрету, зейінді дамыту.

БАРЫСЫ:

І. Сәлемдесу.

Өз есіміңізге сын есім қосып танысайық.

Әдепті - Әмина                                        Үлпілдеген -Темірлан

Жағымды –Сабина                                   Мейірімді – Уарысжан

Нұрдай –Еркежан                                    Оқымысты- Досхан

Ынталы –Елдос                              Ажарлы – Расул

ІІ. Шаттық шеңбері.

- Балалар, бәріміз шаттық шеңберіне жиналайық. Енді бір-бірімізге бүгінгі күніміздің тамаша өтуіне арнап жақсы тілектер айтайық. (Оқушылар «Досыммен бірге» ойыны арқылы бір-біріне бүгінгі күннің көңілді өтуіне арнаған тілектерін айтады.)

Тренинг ережелерімен таныстыру.

Бір-бірін сыйлау.

Ұзақ уақыт сөйлемеу.

Көңілді болу.

III. «Шатастырмақ» ойыны.

          Мақсаты : ойын топтық бірлікті көтеруге бағытталады.

         Ойынның жүргізілуі. Санамақ арқылы жүргізуші таңдалады.Ол бөлмеден шығады., басқа балалар бір бірінің қолдарынан ұстап шеңбер құрады. Қолдарын жіберместен олар қалауынша шатасады. Шатасу пайда болғанда , жүргізуші бөлмеге кіріп , балалардың қолын ажыратпай шешеді.

IV. Мәтінмен жұмыс.   Екі дос (Ел аузынан)

          Ертеде ел арасында жаугершілік жиі болатын кезде  қазақтың екі жауынгері төс қағысып дос болады.

          Бірде әскерлер бір өзеннің бойында қос тігіп дамылдапты. Тұтқиылдан жаудың қалың қолы шабуыл жасапты. Малды айдап, мүліктерін тиеп кетіпті. Қолға түскен азаматтарды айдап әкетіпті. Әлгі екі достың біреуі жау қолына түседі. Досының қолға түсіп қалғанын естіген екінші батыр күздің қара суығын елеместен өзенді малтып өтіп, жау жатқан жағаға келеді. Анталаған жау әскерлері оны тарпа бас салады. Жауынгер өзін қолбасына апаруын өтінеді. Алып келген соң ол жаудың қолбасына:

- Мен қолдарыңа түскен бір жауынгерге құн төлеп, сатып алуға келдім. Менің оған айырбастап берер малым-мүлкім жоқ. Бір-ақ нәрсе беремін. Ол - өзімнің өмірім.  Досымды босатыңдар, ол үшін менің өмірімді алыңдар, - дейді.

     Қолбасы ойланып отырып, оны сынамақ болады да:

Жарайды, мен сені қыршыныңнан қимай-ақ қояйын. Маған сол өміріңнің бір бөлшегін ғана берсең болады, - дейді.

Ол не? – дейді досын құтқаруға асыққан жігіт.

Маған сенің көздерің керек? – дейді қолбасы, - екі көзіңді ойып аламын.

Ол да болсын, көзімді ал да, досымды тезірек босат, - дейді.

     Жігіт бұл сыннан сүрінбей өтеді.

     Әлгі жауынгер тұтқыннан босаған досының иығына қолын салып, зағип күйі қуанып, күлімдеп келе жатады.

          Мұны көрген жаудың қолбасы: «Мынадай ерлері бар халықты тұтқиылдан келіп, қапыда бас салған жағдайда болмаса, бетпе-бет ұрыста жеңу қиынға соғады.» деп түйеді. Сөйтіп өз әскерлеріне шегінуге бұйрық беріпті.

Екі жауынгер қалай дос болыпты?

Қазақ жауынгері досын тұтқыннан құтқару үшін не деді?

Қосбасы оны қалай сынамақ болды?

Қолбасының өз әскерлерін алып кетуіне не себеп болды?

Бұлар қалай достасты?

V.  « Шатастырғыш»

 Мақсаты : зейіннің тұрақтылығымен шоғырлануын жаттықтыру.

          Жаттығудың жүргізілуі : 2 ойыншыдан тұратын 2 топ құрылады,әрбір топта кімнің 1-ші нөмірлі, кімнің 2-ші нөмірлі екені анықталады.1-ші  ойыншылар, 2-ші нөмірлі ойыншыға қарап дауыстап санай бастайды, бірі 100-ге дейінгі жұп сандарды атаса, 2-сі 99-ға дейінгі тақ санды атайды. Әрқайсысы соңғы санға қарсыласынан бұрын жетуге ұмтылады.Әрбір топтың 2-ші ойыншылары өз қарсыластарың мұқият тыңдап қателессе жетекшіге хабарлайды. Мұнан кейін 2-ші рольдегілер 1-шілермен ауысады.

         «Жүректен-жүрекке жылы лебіз білдіру».

         Балалар  шаттық шеңберіне келе қойыңыздар. Енді қасымыздағы адамға жүрекке жылы сөздер жазып беру.