"Іздегенде табылатын қасыңнан" ашық сабақ

                          Іздегенде табылатын қасыңнан

Қажмұратова Гүлзира Ғаділшеқызы

«Өзін-өзі тану» рухани-адамгершілік білім бағдарламасының үшінші деңгей мұғалімі,

Жалпы білім беретін Бұлан орта мектеп-балабақша кешені,

Бұлан ауылы, Сырым ауданы,

Батыс Қазақстан облысы

Сынып:     8

Құндылық: Дұрыс әрекет

Қасиеттер:   әділ болу, өз-өзіне сенімді болу, әдептілік

Сабақ мақсаты:

    Оқушыларға достықтың адам өміріндегі маңыздылығын айта отырып, дұрыс әрекет құндылығының мәнін ашу.

 Сабақтың міндеттері:

    - Оқушыларға өмірдегі әділеттіліктің маңыздылығын ұғындыру;

   - Оқушылардың  бойындағы өз-өзіне деген сенімділік қасиеттерін    дамыту; 

   - Оқушыларды  әдепті  болуға тәрбиелеу

     Сабақ барысы:

       Ұйымдастыру кезеңi.

  Өзін-өзі тану сабағының ережесі «5-Т» қайталау,

  «5» жұмыс құралын түгендеу: күнделік, оқулық, жұмыс дәптері, қаламсап, қарындаш.

      Тыныштық сәті. «Нұрға бөлену»

  /жай музыка әуенімен/

      Үй тапсырмасын тексеру

        №12 сабақ.  43 бет      «Екі дос»      (аңыз әңгіме)

-   Екі достың бір-біріне деген адал ниеті мен достығын қалай бағалар едіңдер?

-   Достардың әрекетінен қандай қасиеттерді көруге болады?

-   Өзара терең сыйластық болған ортада қарым-қатынас қандай құндылықтарға әкеледі?

        Дәйек сөз.

                                      «Адамның көркі-дұрыс өмір сүруінде,

                                      Өмірдің көркі еңбекте»

                                                                                                   Л.Толстой

              / Л.Толстой туралы қысқаша мағлұмат беру /

 -   Неге еңбек-өмір көркін, ал дұрыс өмір сүру –адам көркін келтіреді?

 -   Қандай еңбек арқылы адамдар дұрыс өмір сүреді?

 -   Ой, сөз,әрекет үндестігі бізді қандай құндылықтарға жетелейді?

      Әңгiмелеу                   «Екі дос»    (аңыз әңгіме)

    Ертеде қазақтың екі жауынгері төс қағысып дос болады. Кенет тұтқиылдан жаудың қалың қолы шабуыл жасап, елдің мал-мүлкін  тонап, азаматтарын айдап әкетеді.Досының қолға түсіп қалғанын естіген екінші батыр, күздің қара суығын елеместен, өзенді малтып өтіп, жау жатқан жағаға келеді.Анталаған жау әскері оны бас салып ұстап, тұтқынның сұрауымен қолбасына алып келеді.

    Жігіт қолбасына:

    -Мен қолдарыңа  түскен бір жауынгерге құн төлеп, сатып алуға келдім. Бірақ менің беретін мал-мүлкім жоқ, тек өмірімді ғана бере аламын. Өмірімді алып, досымды босатыңдар,-деп өтінді.

    Қолбасы:

    -Жарайды, мен сені қыршыныңнан қимай-ақ қояйын. Маған сенің көздерің керек, екі көзіңді ойып аламын,-дейді оған.

    -Ол да болсын, көзімді ал да, досымды босат,-дейді жігіт.

    Келісім бойынша оның екі көзін ойып алып, досын тұтқыннан босатады.

    Әлгі жігіт тұтқыннан босаған досының иығына қолын салып, күлімдеп келе жатқан екен.

    Мұны көрген жаудың қолбасы: «Мынадай ерлері бар халықты бетпе-бет ұрыста жеңу қиын екен» деп шешіп, әскерлеріне шегінуге бұйрық берген дейді.

   -Қолбасының: «Мынадай ерлері бар халықты бетпе-бет ұрыста жеңу қиын екен» дегенін қалай түсінесіңдер?

 - Досын құтқарған жігіттің  ойы, сөзі, іс-әрекеті үйлесім таптыма?

 - Дұрыс әрекет жасайтын адамның бойынан қандай қасиеттерді  көруге болады?

Шығармашылық жұмыс, топтық жұмыс.  /7мин/

Оқушылар өздері таңдаған пішіндер бойынша екі топқа бөлінеді. Төмендегі жағдайларды сахналап көрсету.

 1-топ:  Сабақтан тарап келе жатырған кезде көшеден әмиян тауып алдыңыздар, сіздердің әрекеттеріңіз қандай болады?

  2-топ: Таңертең сабаққа келе жатқан кезде көшеден бір адамның құжаттарын тауып алдыңыздар.Бұл жағдайда не істеуге болады?

   Үй тапсырмасы. №13 сабақ  46 бет  «Дос жүрегі».  Ә.Ахметов

   Топпен ән айту. 

                                       «Өміріңе немқұрайлы қарама» 
                                          әні: Сәкен Дәрібаев:   сөзі : Серік Сейітман 
Тыңда досым, мен айтайын от тілек, 
Дүниеден кетті бай да, өтті бек. 
Өміріңе немқұрайлы қарама, 
Дәулетіңмен тұрсаң дағы көк тіреп.

Әр күн сайын тек сен үшін атып таң, 
Зерлі шапан киінсең де жақұттан. 
Өміріңе немқұрайлы қарама, 
Шақша басың айналса да бақыттан 
        қайырмасы: 
Бақ құсыңды қонған кезде бағала. 
Қолда мәңгі тұрмайтын ол шағала. 
Кенелсең де досым қанша шаттыққа 
Өміріңе немқұрайлы қарама,

Бақ құсыңды қонған кезде бағала. 
Қолда мәңгі тұрмайтын ол шағала. 
Қанша азап көрсең дағы,бауырым, 
Өміріңе немқұрайлы қарама,

Тұсау салып бастатқызбай көш дара, 
Етсе дағы дұшпан күлкі,дос таба. 
Өміріңе немқұрайлы қарама, 
Тағдыр желі қарсы алдыңнан соқса да.

Сын сағатта сақтау үшін өз басын, 
Сатып кетіп сеніп жүрген жолдасың. 
Өміріңе немқұрайлы қарама, 
Айдын көлге айналса да көз жасың.

Сабақ соңындағы тыныштық сәті.

                       /Баяу  музыка ойнап тұрады/

      Өмірге деген көзқарасы ортақ,дүниетанымы деңгейлес, бір-бірін оңай түсінетін жандар бір-бірімен дос бола алады. Ал оның сақтаушысы адалдық пен шынайылық.

Енді бір сәт тынышталып,көзімізді жұмайық.Бүгінгі сабақтан алған әсерлеріңізбен, жақсы ойларыңызды естеріңізге түсіріп көріңдерші. Ол өздеріңізбен бірге қалу үшін жүректеріңіздің түкпіріне сақтап алыңыздар.

      Бүгінгі сабағымызды қорытындылай келе сіздерге тек қана адал, таза, ақ ниетті достарыңыз көп болсын деп тілеймін.Өздеріңізде нағыз дос бола біліңіздер.

     Әр күндеріңіз қуанышқа пен нұрға толы болсын.