Ашық тәрбие сағаты "Тәуелсіздік тұтқасы-бізге аманат"

Сабақтың тақырыбы: «Тәуелсіздік тұтқасы-бізге аманат» 
Мұғалім: Армысыздар, құрметті ұстаздар, оқушылар және қадірменді қонақтар! Бүгінгі Тәуелсіздігіміздің 24 жылдығына арналған «Тәуелсіздік тұтқасы-бізге аманат» атты тәрбие сағатына қош келдіңіздер! 
Тәуелсіздік - ең басты құндылығымыз. Тәуелсіздікке қантөгіссіз, бейбіт түрде қол жеткізгеннен кейін ғана елімізді әлемнің өркениетті мемлекеттерінің қатарына қоса алдық. 24 жыл ішінде тәуелсіз Қазақ елін қалыптастырып, нарықтың қиын өткелектерінен аман өткізіп келеміз. Осы кезеңде Қазақстанды дүние дидарындағы ең мықты мемлекеттер танитындай, сыйлайтындай деңгейге жеткізген тұңғыш Нұрсұлтан Назарбаевтай көреген саясаткердің ерен еңбегін дәл бүгін және әрқашанда айтып өтеміз. 
Тәуелсіздік күні еліміздің барлық азаматтары үшін орны ерекше мереке деп білеміз, себебі, осынау жүрекжарды қуанышқа толы күнді ата - бабаларымыз ғасырлар бойы армандап, күтумен өтті.
Оқушылар Желтоқсан көтерілісі, себептері жайлы мәліметтерін оқиды.
Интербелсенді тақтадан «Желтоқсан желі» әнінің бейнебаянын көрсету.                      Бейнебаян төңірегінде әңгіме өрбіру.
Оқушылар мәнерлеп өлең оқиды.

1-оқушы:Тұрса да биік өр басын,   
Қазаққа бақыт орнасын. 
Сексен алтыншы жылғыдай, 
Желтоқсан желі болмасын!

2-оқушы:Армандарды жақындатып тым алыс, 
Біздің жаққа жеткен екен жылы ағыс. 
Егемендік - ел бақыты, ертеңі, 
О, халайық! Құтты болсын қуаныш! 
3-оқушы:Азат өлкем күндей күлген шығыстан,   
Асыл елім жан - жүректі ұғысқан. 
Ата бабам аңсап өткен бақытым, 
Айналайын, Қазақстан - Гүлстан! 
4-оқушы:Кең байтақ, көз жетпейтін жерім менің   
Таулы орман, жасыл жайлау көлім менің 
Бүгінде бар әлемге даңқың жетті 
Тәуелсіз Қазақстан – елім менің 
4-оқушы:Бейбіт өмір тілеймін мен халқыма 
Туған тілім шұбарланба жарқыра 
Тілейтінім барша жұртқа бір ғана 
Ырыс, бақыт, татулық пен ынтымақ. 

Желтоқсан құрбандарының өмірбаянына шолу жасалады.                                               Ән: «Алға, Қазақстан»

Презентация «Тәуелсіздік жетістіктері»
Мұғалім:Қазақ дейтін менің бір елім, 
Жатыр алып жарты дүние әлемін. 
Бұл даланы анам жаспен суарған, 
Бұл далаға жылап келіп қуанған, - деп Қасым Аманжолов ағамыз жырлағандай, кең байтақ жерімізде Қазақ халқының басынан не өтпеді десеңізші. Талай қиындықты бастан кешірсе де, ешқашан мойымай, күресе білді. Азаттық таңы туатынына кәміл сеніп, үміттерін үзбеді. 
«Орнында бар оңалар» демекші, ел орнында, жер орнында, жерге жетер байлық жоқ. Жер болса, ел болады, ел болса ер болады. Ерлеріміздің арқасында «Қазақстан» егеменді ел болып, дүние жүзіне танылды. 120-дан аса ұлт өкілдері тұратын осынау қасиетті мекенде, асқақтаған өлкеде, кеңшілігі керемет дархан дастархандай далада, егіні теңіздей толқыған, төрт түлігі өрбіген, өндірісі өркендеген мекенде өмір сүруші әрбір адам өз Отанын жанындай сүйіп, оның көк байрағын көкке көтеруді мақтаныш тұтады. 
Ән: «Көк тудың желбірегені»

Ту тігілді халқымның бүгін бағына
Жас өрендер желбіретіп нық ұста
Ғасырларға жалғастырып елдікті
Дақ түсірме ата баба рухына
Үлгі бізге аталардың ерлігі
Ұлағаты өнегесі еңбегі
Тәуелсіздік туын ұстап жоғары
Бүгінгі ұрпақ болар елдің ертеңі дей келе бүгінгі тәуелсіздігіміздің 24 жылдығына арналған «Тәуелсіздік тұтқасы- бізге аманат» атты тәрбие сағатымыз  өз мәресіне де келіп жетті. 
Қазақ елім! Туды жастық дәуірің. 
Алғандайсың жұлдызыңның жарығын. 
Тәуелсіздік құтты болсын, қымбаттым, 
Туған күнің құтты болсын, алыбым! 
Тәуелсіздігіміздің тұғыры биік, халқымыздың еңсесі жоғары, егемендігіміз баянды болсын деп тілейік, ағайын. Келесі кездескенше сау саламатта болыңыздар!