Безродных атындағы орта мектебі
Тарих пәнінің мұғалімі
Слямов Ерлан Нүсіпханұлының
«Орбұлақ шайқасының батыр
Салқам Жәңгір ханы» атты баяндамасы
Тарихымызды
тас ғасырынан тартып жырласақ та, одан бергі замандардан қозғасақ та қазақ
елінің жер бетінде мәңгі жасап келе жатқандығын көреміз. Сол замандарға ойша
сапар шегіп, тарих тағылымына бойлай алсақ, қазақтан асқан жауынгер халықтың
жоқ екендігін аңғарамыз. Оған дәлел, Еділ патша, ал Томиристің, яғни, Тұмар
ханшайымның ерлігі әлемге әйгілі. Кирдың иығынан басын домалатқан Тұмар
ханшайым болсын, Дарийды шөлге апарып қырғынға ұшыратқан айлалы Шырақ болсын,
бәрі бабаларымыздың белдескеннің белін үзетін батырлығының куәгері. Ал сол
ғасырдан тартып бүгінге дейін шолу жасайтын болсақ, Орбұлақ шайқасының маңызы
мен мәні зор екенін білеміз. Аз сарбазбен өзінен 80 есе көп әскердің
тас-талқанын шығарып салған шайқас қазақ тарихында Орбұлақтан бұрын да, кейін
де болмаған. Осы сұрапыл соғыс бабалар ерлігінің жаңғырығы іспетті. Содан
кейін де тарихшылар бұл шайқасты жүз елу жылдық қазақ-жоңғар соғысының елеулі
беттерінің бірі деп санайды. Ал қазақ тарихында Орбұлақ шайқасы жайлы тарихты тағы бір
қаузап, оның маңызын замандастарымызға айтып, сол бабалардың ерлігіне бас иіп
өтуіміздін керектігі даусыз.
Орбұлақ шайқасы 1643 жылы болған. Ол
Жоңғардың Батур қонтайшысы 50 мың қолмен Жетісудың шығыс қақпасынан басып
кірген уақыт еді. Бейқам жатқан
қазақ елі бұл соғысқа тас-түйін дайын болмаған соң Жетісу өңірін билеген
Есім ханның ұлы Жәңгірдің жоңғарларды бар-жоғы 600 әскермен күтіп алуына тура
келеді. Алайда бұл шарасы таусылғаннан, тығырыққа тірелгеннен басын бәйгеге
тігіп, нар тәуекел деп бел буғандық емес еді. Көзсіз батырлығымен аты шыққан
600 әскердің әрқайсысы жүз сарбазға бергісіз рухтың иесі болатын. Жәңгір
бабамыздың жаудың қисапсыз әскеріне тойтарыс беретін ұрыстағы тактикасы
ғаламат тапқырлықтан туындаған болса, екінші жағын жер сырын жетік білгендігі
деп түсінеміз. Қыран құстың жемтігін ауламас бұрын тұяғы мен тұмсығын тасқа
қайрап, тұғырын сайлап алып барып қанатын қомдайтыны секілді, Жәңгір ханның
да жауына шүйлігер жерді көрегенділікпен бағамдағаны соғыс тактикасын жете
білуін аңғартпай ма?! Иә, тарих шынымен де тасқа басылар, санада жаңғырар ұлы
құндылықтарымыздың бірі және бірегейі. Қазақ халқы өзінің адал
перзенттерін ешуақытта ұмытпаған. Олар туралы деректер жыраулар мен ақындар
арқылы ұрпақтан-ұрпаққа жетіп, ел есінде мәңгілік сақталған.Батырлық дәстүріне
негізделген темірдей тәртібі бар дала демократиясы өткенді өнеге ету әдісімен,
талай-талай ұрпақты тәрбиелі етіп өсірді.Соның бір көрінісі Жәңгір ханның
жастайынан әкесінің ұлы істері жайында қанықты болып, ардақты да қасиетті
әкенің ерлігімен сусындап, әке жолын қуып, әке ісін жалғастыру жолында жан
аямай жанкешті өмірі мен ел есінде қалған ерлік істері.Тек әкесі ғана емес,
бабалары да ел қорғаған батырлар болған.Олардың да оның қалыптасуына ықпалы
орасан зор әсер еткені даусыз.Өткеннен өнеге деген осы. Тектіліктің тереңінде
жүзіп, ар-ождан мен намысты ту етіп көтерген Салқам Жәңгір ханның таңғажайып
ерлігі мен өнегелі істері өскелең ұрпақ үшін өте маңызды.
Жәңгірдің – арғы бабасы Шыңғысханның тікелей өкілі, Жошы ханның Орда Ежен атты
үлкен ұлынан тараған ұрпақ.
Жәңгірдің шын есімі – Жаһангер
(парсыша «әлемді бағындырушы, билеуші»). Ал Жәңгір ханның бүгінгі ұрпақтарының есімін ұран етуге
дайын екенімізге сенеміз. Тұғырын сайлап алған Салқам Жәңгірдің қас дұшпанына
қырғын салғанына 372 жыл өтсе де ел есінде мәнгі қалары сөзсіз.
Жоңғар әскерінің бағытындағы тар
тау шатқалының ішінде ор (окоп) қаздырып, онда мылтықпен қаруланған 300 жасағын
қалдырады да, өзі қалған әскерімен қарсы беттегі тастардың артына жасырынады.
Хонтайшы әскері окоптағыларға жақындағанда Жәңгірдің 300 таңдаулы мергендері
оларға күтпеген жерден оқ боратып, жусатып салады. Тым-тырақай қаша жөнелген
жаудың әскеріне сұлтанның өзі атты әскерімен тұтқиылдан соққы береді. Шатқалдың
өте тарлығынан алға, артқа жүру мүмкіндіктері болмағандықтан, жау әскері сандық
артықшылығын пайдалана алмады.
Міне, осының бәрін ой елегінен аз уақытта өткізіп, қысылтаяң шақта
абыржымай шешімін тауып, жау жасағын жер жастандырудың оңтайлы жолын қапысыз
тапқан Жәңгір ханды Салқам десе, дегендей.
Осы орайда өзінен әлдеқайда аз әскерден қырғынға ұшыраған қалмақтар
қазақ жауынгерлеріне қарсы тұра алмасын жан-дүниесімен сезініп, бабаларымыздын
ерлігіне бас игендігін аңғаруға болады. Күші басым жауды
жермен-жексен ету арыстан жүректі, құрыш білекті батыр бабаларымыздың, жалпы
қазақ халқының рухы беріктігінің жарқын дәлелі. Ерлік пен өрліктің әнұранына
айналған, шайырлардың дастанына арқау болған Орбұлақ шайқасының тарих атты аспантауымыздан
алар орны ерекше. Өйткені, бұл шайқас ерліктің Хантәңірі іспетті, ұлы
шайқастардың көшбасы, келер ұрпақтың да жадында жатталар қазына болып қала
бермек.
Арқырап жау шапқанда атқа қонған қайсар қазақтың батырларын хатқа
тізіп, тасқа қашап жазып бітпеспіз. Ел шетіне жау келсе,
еңкейген қариядан аттың жалын тартып мінген балаға дейін аттанға аттан қосып,
айбаттанып шығары белгілі. Намыс атты томағасын сыпырып қайсарлықтың қия
шыңында қыранша шаңқылдап тұрар тұғырлы елміз. Жауын бөктермей жағасы
жайлаудан келмейтін тектілердің есімі таудың тасына ойылып жазылар болса, тас
бетінде жазар орын қаларына күмәніміз
бар. Осы айтылған сөзге дәлел болар кешегі Ор шайқасындағы әрбір сарбаз. Самұрықтай
Салқам Жәңгір бастаған 600 жауынгерді батыр десек, жер қайысқан жау
жасағына қаймықпай қарсы тұрған сол бабалардың ерлігіне пара-пар дүние
табылмас. Тіпті, дүниежүзі тарихындағы оқиғалар Ор шайқасындағы ерлікті іштей болса да мойындайтыны ақиқат.
Бұл да ұлы даланың қожасы бола білген қазақ елінің ежелден батыр екендігін
бар әлемге паш етері сөзсіз.
Орбұлақ шайқасының атын аңызға айналдырып, қазақ елінің
айбынын асқақтатып, Жоңғар хандығының күйреуіне себепкер болған соғыстың бірі
болған бұл айқаста жанын шүберекке түйіп, тыңнан түрен салған батыр бабалардың
есімі ел жүрегінде деп айту да қиын мәселенің бірі. Себебі алты жүз сарбаздың
кім екендігі туралы толықтай мәлімет жоқтың қасы. Бізге жеткен деректер
бойынша, Қарасай, Ағынтай, Жиембет, батырлардың
есімі ғана белгілі. Дегенмен де, жеңістің туын желбіретіп, ел азаттығын алуға
зор үлес қосқан бұл батырларды дәріптей алсақ, оның өзі қалған әскерге деген
құрметтің бір белгісі болары сөзсіз.
Орбұлақ шайқасының негізгі қос батыры әрі бас қолбасшылықты
атқарған Салқам Жәңгір мен Жалаңтөс батыр бір бірімен айнымас дос болып, ел
мен жерді жаудан азат ету жолында ат тұяғымен оңтүстік, шығыс, батыс жерлеріне
жол салғаны белгілі
Елбасы Н.Ә.Назарбаев сөйлеген сөзінде : «Орбұлақ пен
Аңырақайдағы тарихи маңызды жойқын жеңістер де Азаттықтың ақ туы астында
желбіреді», деп бұл бақытты күнге сол жеңістердің арқасында жеткенімізді
айрықша атап өткен еді. Еліміздің тарихындағы ұлы жеңістер мен сан алуан оқиғаларды
санамалап қарасақ, солардың өткен кезі мен болған жері бізге нүктесіне дейін
белгілі боп жеткені Орбұлақ жеңісі, Ордабасы жиыны, Аңырақай шайқасы,
Ойрантөбе оқиғасы секілді бірен-сараны ғана. Сондықтан оларды біз ата-бабамыз
қалдырған тарихи жәдігер санаймыз әрі мұны ұмытпаңдар деген аманаты деп
бағалаймыз.
Ғасырлар бойы үздіксіз басқыншылық жүргізген отарлық саясаттың
тарихымызға жасаған қатал қиянатының есірінен,халқымыздың өткені мен кеткенінен
көз жазып қалғандаймыз.Санасыздықтан емес, әрине, шарасыздықтан. Кешегі
кеңестік дәуірде ел қорғаған батырлар мен ел қамқоры хандарымыз туралы айтуға,
жазуға қатаң тиым салынды емес пе? Басқа түскен бұғаумен, ноқталанған күй
кештік.Әлемде теңдесі жоқ соғыс өнерін жүзеге асыра білген Салқам Жәңгір хан
секілді, ұлтымыздың ғана емес әлемдік деңгейдегі ұлы тұлғамыздың бар екенін
біріміз білсек, біріміз білмедік.
Бүгінгі Тәуелсіз елдің перзенттері, кешегі айбатынан әлем
жұртшылығы сескенген батырлардың ұрпағы, біздер сол жаужүрек жандарға ғұмыр
бойы бас иіп, тарихтың шаңында қалдырмай, есімдерін ұран етіп жүруіміз керек. Ол
бүгінгі әр Қазақстандық азаматтың борышы, өмірлік парызы.
Оставьте свой комментарий
Авторизуйтесь, чтобы задавать вопросы.