Менің мамандығым - менің мақтанышым. Эссе

Мойынқұм ауданы әкімдігінің білім бөлімінің

О.Жандосов атындағы орта мектебі

Тақырыбы:

(Эссе)

Орындаған: Г.Н.Аденова

2018-2019 оқу жылы

Мен  Аденова Гүлмира Нағымқызы О.Жандосов атындағы орта мектебінде көркем еңбек пәнінің мұғалімі болып 2014 жылдан бері еңбек етіп келемін. Оқушыларға еңбек пәнінен дәріс бере отырып, 8 сынып оқушыларына жетекшілік етіп келемін. 8 сыныптағы 22 оқушы менің үйдегі екі баламнан ешбір кем емес. Себебі, олар менің жүрегімнен екі ботақаным қандай орын алса, сондай орын алды деп ойлаймын. Жұмысқа келген бетте сынып оқушыларын түгелдеп, 22 оқушының көңіл-күйін тексеріп шығып, көңіл-күйі төмен бала болса тез арада пікірлесемін. Себебі, әр бала ол жеке тұлға. Оның да ішкі сезімі, өз ойы, өзіндік пікірі, жеке өмірі бар. Әр баланың жүрегіне жол табу -бұл ұстаздың басты міндеті.

Балалармен жұмыс жасау -үлкен бақыт. Себебі, тек қана бала ешнәрсеге алаңдамай мейірімділікке сенеді, кішкентай алақанын менің алақаныма қойып, өз құпияларын айтып маған сенім артады. Балалармен қарым-қатынас маған қуаныш, шаттық сыйлайды. Өйткені, мен оларға, олар маған қажетті екендігімізге сенімдімін.

«Көпшілікті адамшылыққа тәрбиелеу үшін жас буынды жақсылап тәрбиелеу қажет» деп М.Әуезов атамыз айтпақшы, ұрпаққа сапалы білім мен сапалы тәрбие беруде мектептің алатын орны ерекше. Мектеп – өткен мен бүгіннің, бүгін мен ертеңнің арасындағы  дария. Ал, мұғалім сол дариядағы заман талабына сай ағыспен қайық есуші. Оқу – тәрбие ісінде мұғалімдік бейнесін анықтап алса, яғни ескегі мықты болса, қандай болмасын толқындарға қарсы тұрып, жағаға жетеді.

Жетістікке қарай жүрмесең, ұмтылмасаң, жетістіктің саған қарай жүрмесі анық. Сенің жетістігің – еліміздің болашағы алдымыздағы білім алып, тәрбиеленіп отырған балаларымыз. Оларды білімді, тәртіпті, ұлтжанды, иманды, әдепті, рухани - адамгершілігі мол тұлға етіп қалыптастыру. Өйткені мектеп -түрлі саладағы прогрестің бесігі.

Өмір -өзен...Арнасынан таса кейде бұлқына, кейде саябырлаған сабырлы өзен қалпында бізге сан тарау жолдарын көлденең тартары анық. Сан тарау жолымыз - тәрбиенің алуан жолдары. Осы бір сан тарау жолдар «өмір есігін жаңа ашып, өмір баспалдағын» енді аттаған жас бүлдіршіндерге «терең шыңырау», «бұлыңғыр аспан» болары шындық. Міне, осы «терең шыңыраудан» шығарып, оларды түзу жолға салатын бірден - бір тұлға- ұстаздар қауымы.

Мұғалімдік – әлемдегі мамандықтар арасындағы ең біріншісі, құрметтісі, сыйлысы, құдіретті, киелісі. «Мұғалім – халық сенген өкіл» - дейді ойшылдар. Осындай сенімге ие болған мұғалімдік мамандығымды мен мәртебе тұтамын.

Ұстаз болу – үлкен жүректілікті қажет етеді. Жүрегі үлкен мейірімділікке толы адам ғана ұстаздардың ұстазы атанады. Себебі, ол мейірімге, парасатқа толы жүрекпен халықтың баласына қызмет етеді. Ел баласын өз баласынан бөлмей бар мейірімін төксе ғана, ол үлкен жетістіктерге жетіп, үлкен тұлғаға айналады. Сонымен қатар ұстаз – ол халықтың айнасы. Ұстаздан келешек ұрпақ білім және тәлім-тәрбие алып, үлкен өмірге қадам басады. Сондықтан біз сыртқы бейнемізді ішкі дүниемізбен үйлестіріп, ел болашағына қызмет етейік.

Мен өз маманымның иесі екеніме сенімдімін, өз бойымдағы эстетикалық талғамды, адамгершілік пен сезімталдықты, шыдамдылық пен бауырмалдықты жеке басымның мәдениетімен ұштастыра отырып,бүлдіршіндер өмірінде өз ізімді қалдыра  аламын.

Мен өзімді осындай тамаша маман иесі болғандығымды мақтаныш етемін!