Дүкенбаева Сәлима Ерғалиқызы,
директордың оқу ісі жөніндегі орынбасары
№9 орта мектеп
Талғар қаласы,
Алматы облысы
dsaia_82@mail.ru
Тиімді көшбасшылық
– жарқын болашақ кепілі
Қазақстан
Республикасының Президенті Н.Назарбаев 2012 жылғы 9 шілдедегі «Қазақстанның
әлеуметтік жаңғыртылуы: Жалпыға Ортақ Еңбек Қоғамына қарай 20 қадам» атты
бастамасында «Орта білім беру жүйесінде директорлар корпусының сапасын жақсарту
жөнінде шаралар атқару қажет», деп атап көрсеткен болатын. Осы маңызды мәселеге
байланысты жалпы білім беру ұйымдарының басшылары «Назарбаев Зияткерлік
мектептері» дербес білім беру ұйымына қарасты Педагогикалық шеберлік орталықтарында
біліктіліктерін арттыруда. Мен де бұл игі істің куәгері ретінде 2016 жылдың
13-ші қыркүйегінен бастап, "Назарбаев Зияткерлік
мектептері" ДББҰ Алматы қаласы Педагогикалық шеберлік орталығы филиалында
біліктілігімді арттырудамын. Мұнда
келгеннен бері көп жайларға қанығып жатырмын. Еліміздің үш облысынан келген
жалпы орта білім беретін мектеп көшбасшылары жаңа бағдарлама бойынша
біліктілікті арттыру курсының «бетпе-бет» кезеңдерін аяқтап, алған білімдерімізді
тәжірибеде қолданып, іске асыру мақсатында 6 айлық ұзақ мерзімді тәжірибеден
өтудеміз. Курс барысында кәсіби біліктілігін жетілдіру жағынан өзімді көшбасшы
ретінде басқаша тұлға ретінде сезіне отырып, адамда өзіне және өзгеге деген
сенім болса алмайтын қамалы, шешпейтін амалы болмайтынына көзім жетті. Осы
сенім менің өзгеруіме бетбұрыс жасады. Санада сіңіп қалған дәстүрлі оқыту және
жаңаша көзқараспен көшбасшылық ету арасындағы айырма нәтижесінде мектеп
үдерісіне қажетті өзгерісті, оны іске асыруда көшбасшылық қасиетке ие бола
аламын деген сенім өз жемісін бере бастады. Бүгінде
білім беру бағдарының ауысуына байланысты мектеп басшыларының рөлі де өзгеруде.
Сол себепті мектепті басқару жұмысында іскерлікпен қоса, білім беру үдерісін
шығармашылықпен ұйымдастыруға әрекет жасаудамын. 6-айлық ұзақ мерзімді тәжірибеге
жоспарлаған МДЖ-2-ні іске асыру барысында, әріптестерімнің қолдауы мен
қызығушылық танытуы мені қанаттандыруда. Бүгінгі күнде коучинг өткізу, тәлімгерлік
жүргізу, Lesson Studyды мектеп үдерісіне енгізу жаңалық емес, себебі әр жалпы
білім беру ұйымдарында жүріп жатқан үдеріс деп ойлаймын. Ал менің тәжірибемдегі
ерекшелік, "Назарбаев Зияткерлік мектептері" ДББҰ тәжірибесіндегі
"100 ән, 100 кітап" Бағдарламасын мектепке ҚР Тәуелсіздігінің 25
жылдығына орай "25 ән, 25 кітап" жобасын мектепті дамыту жоспарына
енгізгенім. Бұл жобаны 2016 жылдың қазан айынан бастап енгізгенім, бұл күнде аз
да болса нәтижесін беруде. Жобаны жүйелі түрде жүргізу үшін жауапты кісілердің
тізімін құрып алдым: МД тәрбие орынбасарлары – Э.Төребаева, Қ.Долқын,
педагог-ұйымдастырушы – М.Әбдіреш, кітапханашы – Т.Қасымжанова, музыка пән
мұғалімі – Р.Қабаев. «25 кітап, 25 ән» тізімі сынып жетекшілері, пән
мұғалімдері және мектеп оқушыларына таныстырылып, жыл соңына дейін оқығандарына
эссе өткізіп отыру керектігін ескерттік. Бұл жоба көптің көңілінен шыққан, қолдау
тапқан, оқушылардың таным-түсінігін кеңейтуге бағытталған рухани жоба. Жоба
аясында мектеп оқушылары әр түрлі тақырыпта өткізілетін сайыстар, әңгімелесулер,
дәрістер, әдеби кештер мен кештерге қатысуда. Сондай-ақ ақын-жазушылардың
шығармашылығымен танысып, шет ел ақын-жазушыларының өмірбаянымен,
шығармашылығымен танысуда. Қаңтар айында «Абайдың қарасөздерінің өмірлік мәні
бар ма?» тақырыбындағы өткен панельдік дискуссияның 8-11 сынып оқушыларына
әсері мол болды. Қарасөздердің мағынасын талдап, оның өмірге қажеттілігін,
өмірде бағдар ретінде қолдану керектігін ұғынып, өз ойларымен бөлісті.
Сондай-ақ «Мұхтар Әуезов шығармаларындағы ерекшеліктер» тақырыбында өткен
пікіралмасуда 5-7 сынып оқушылары шығармалардағы кейіпкерлерді талдай отырып,
өмірде өздеріне сабақ алды. Және ұтымды да мағыналы ойларын бөлісу арқылы,
бір-бірлерін басқа қырларынан тани алды. Сонымен қатар 5-11 сынып оқушылары әр
шығарманы оқығандағы сезімдерін эссе арқылы жеткізеді. 25 әннің тізімі сынып
жетекшілеріне ұсынылып, әр дүйсенбі сайын жиындарда айтқызу арқылы оқушылар қазақтың
әндерін бойларына сіңіріп, патриоттық сезімдерін арттыруда. Әрбір оқушы өз
мәдениетіне, ұлттық құндылықтарын құрметтей білуге тәрбиеленуде.
«Тоқсан ауыз
сөздің тобықтай түйіні» курс барысында жаңартылған білім беру
мазмұнының басты идеясын түсіндім және маған оқу-тәрбие үдерісінде көшбасшылық
етуде қажетті бағдар берді, менің жаңартудағы қарым-қатынасым өзгерді. Қазақтың
кемел талантты ұлы ұстазы Ахмет Байтұрсынов: «Елді түзетуді бала оқыту ісін
түзетуден бастау керек», -дегендей, біз тек бүгінгі күнмен ғана емес,
келешек дамуымызды ойлап өмір сүруге тиістіміз.
Оставьте свой комментарий
Авторизуйтесь, чтобы задавать вопросы.