Урок на тему: "Джумледе муптеда ве хабер"

Мевзу:Джумледе муптеда ве хабер

Дерснинъ макъсадлары:

-талебелернинъ баш азалары акъкъында бильгилерини зенгинлиштирмек;

-джумледе муптеда ве хаберни айырмагъа огретмек;

-балаларнынъ мантыкъ фикирлерини инкишаф этмек;

Дерснинъ теминаты: интерактив тахтасы.

                                        Дерснинъ кетишаты:

I.Дерснинъ мевзусыны бильдирюв.Бугуньки дерсимиз муптеда ве хаберге багъышланаджакъ,сиз оларны джумлелерде тапмагъа огренеджексиз.

Талебелерде янъы мевзугъа меракъ уяндырмакъ макъсадынен оджа дерсни масал айткъан киби башлай:Бир заманда бир дагъда дюльбер ве акъыллы айван яшай экен.Оларнынъ озьлерининъ къобалары ве ювалары олгъан.Эр кунь олар озь къобаларындан ве юваларындан чыкъып,бири-биринен субетлешелер.Бу айванлар эписи джумле азалары олгъан.Энъ буюклери Арслан ве Къашкъыр.Арслан-мен муптедам,Къашкъыр исе-мен хаберим дегенлер.Берабер:Биз джумленинъ баш азаларымыз!

Арслан:Биз джумле дагъындан кельдик.Экимиз достмыз.Мен джумледе ким я да не акъкъында айтылгъаныны бильдирем ве Ким?Не? суаллерине джевап берем.

Ким?                                                                                            Не?

Талебе                                                                                        Рале

Оджа                                                                                              Китап

Эким                                                                                               Дефтер

Айдавджы                                                                                    Къалем

Эмшере                                                                                      Терек

Къашкъыр:Мен исе муптеда акъкъында не айтылгъаныны бильдирем ве Не япа? Не ола? Суаллерине джевап берем.

Арслан:Джумледе муптеданынъ тюбюни бир сызыкънен сызалар.

Къашкъыр:Хабернинъ тюбюни исе эки сызыкънен сызалар.

                                           Не япа?Не ола?

                                            Окъуй

                                               Яза

                                               Раатлана

                                            Чалыша

                                               Отура

Раатлыкъ дакъкъасы:

Мен,сен,о,биз,сиз,

Достлаштыкъ эпимиз.

Сыныфдаш,кель ойнайыкъ,

Эль-эльге тутушайыкъ.

Пекитюв.Талебелер оджанынъ суаллери ярдымынен муптеда ве хабер акъкъында алгъан малюматны текрарлайлар.Дерсликнен чалышув:43-нджи саифедеким 76-нджы иш.

Нутукъ инкишафы.Ресим эсасында джумлелер тизмек.Энъ яхшы джумлелер тахтада ве дефтерлерде языла,оларда муптеда ве хабер тапыла ве тюбю сызыла.

Вазифелер:Джумледе къайсы баш азасы ёкъ?

1.(Талебелер) дерсте яхшы чалышалар.

2.(Анам) къаве пиширди.

3.Тёпеде къуш (уча).

4.Талебе мектепте (окъуй).

Дерснинъ нетиджеси.Бугунь биз насыл мевзуны огрендик?

Балаларгъа баа къоюв.

Эв вазифеси.Окъув китабындан бешер муптеда ве хабер тапып язмагъа.