Өзін-өзі тану "Мені шабыттандырады, мен шабыттанамын" эссе

Ақмола облысы Жарқайың ауданы

Уәлиханов ауылы

Уәлиханов орта мектебінің

Өзін-өзі тану пәнінің мұғалімі

Калдыбаева Сауле Жаксылыковна

Мені шабыттандырады, мен шабыттанамын.

Әр мұғалім – философ , психолог, ойшыл , шебер , өйткені мұғалім – шығармашылық мамандық иесі. Сондықтан ұстаз шабытсыз болмайды. Әр күні әр сабаққа дайындалған кезде , әсіресе сабақтан тіс шараларға дайындалғанда , әр түрлі сценарий, баяндама немесе мақала жазғанда шабыттанамын . Мен үшін рухани күштің қайнар бұлағы - жақын жандар. Көңіліме жақын жандардың мейіріміне , сүйіспеншілігіне бөліне отырып шабыттанамын. «Жақсы адамды көргенде- жаның семіреді», - деген мақал тегін айтылмаған.

Сонымен қатар қазақтың мақал-мәтелдері туралы ерекше айтқым келеді. Бұл халықтың рухани мәдени асыл қазынасы , қысқа да нұсқа, әсіресе өзін-өзі тану сабақтарына өте пайымды. Сабақтарда мақал-мәтелдермен әр түрлі жұмыстарды өткізуге болады, мысалы кез келген тақырыпқа «Мақалды жалғастыр » деген тапсырмаларды орындау ретінде. Мақал-мәтелдер балаларды рухани байытады.

Мұғалім мамандығы шабытты еңбек. Оның шеберлік шыңы – баланы танымның, түсінудің үдерісіне ендіру, ізденіс пен жаңалыққа ұмтылдыру, шығармашылыққа баулу. «Өзін-өзі тану» пәнінің мұғалімін – идеал адамның мүсіншісі, өмір – теңізде жол сілтеуші деп танимын. Л.Толстойдың сөзімен айтқанда: «Егер мұғалім өз ісін сүйсе, ол жақсы мұғалім». Бірнеше жыл қатарымен осы пәнді балаларға үйретіп, мұғалімдік қана емес, өмірлік тәжірибемнен бөлісіп, оқушыларымды жақсылық жасау, сүйіспеншілік пен қарым-қатынас құру жоғары даналық екенін білдім. Мен үшін «өзін-өзі тану» пәнін беру сыры терең, жұмбақ, бөлек дүниеге ену.

Ұлы ағылшын ағартушысы Уильям Уорд: « Жай мұғалім хабарлайды, Жақсы мұғалім түсіндіреді, Керемет мұғалім көрсетеді, Ұлы мұғалім шабыттандырады»,- дейді. Мен оқушыны шабыттандыру үшін, ол оқушыны түсінуге, кемшіліктері мен артықшылықтарын, жақсы қасиеттерін табуға тырысамын. Себебі, бір оқушыға «Жарайсың», «Сен дарындысың» «Сен бүгін мені қуанттың» деген сөздер шабыт берер болса, енді бірі «Менен асқан оқушы жоқ» деп, тоқтап қалуы мүмкін. Ондай жағдайда керісінше «Сенің бұдан артыққа шамаң келеді» деген сөздермен мақсатын айқындай, талпындыра түсемін. Әрбір баланың бойында кішкентай болсын жақсылық нәрін тауып, соны ту етіп ұстап, биік адамгершілік құндылықтарға жетелеуге тырысамын. Әрбір сабақтан шыққан оқушы шабыттанып шығуына өз жүрек жылуымды беруден аянбаймын, бойындағы күшіне деген сенімін асыра түсіруге күшімді жұмсаймын.

Бақыттың үлкені – еңбегіңнің нәтижесі ойдағыдай болуы. Ал «өзін-өзі тану» пәні мұғалімінің еңбегінің нәтижесі қай уақытта көрінеді? Ол алдындағы шәкіртінің қияға қанат қағып, елінің азаматы болған сәтінен көреді деп ойлаймын.