Логотип Инфоурока

Получите 30₽ за публикацию своей разработки в библиотеке «Инфоурок»

Добавить материал

и получить бесплатное свидетельство о размещении материала на сайте infourok.ru

Инфоурок Начальные классы Другие методич. материалыРассказ собственного сочинения на родном эрзянском языке "Прякат-сюкорот" (Пироги-булочки").

Рассказ собственного сочинения на родном эрзянском языке "Прякат-сюкорот" (Пироги-булочки").

Таргочинь валске. Авам эри монь кедьсэ. "Авай, сак ярсамо! Прякатне писть"- тердян эйсэнзэ столекшес. Неть монсень валтнэде таго мекс нусмакадынь. Апек умок истя тердиль авам монь эйсэ ярсамо. Ней весе полавтовсь. Авань таркас арынь мон. Сон допрок сыредсь. Авань сырексчизэ неяви весемесэ: молевкснэнзэ, чама-лицясонзо.... Ансяк вейкенть сонзэ эйстэ эзизе токаде сырексчись. Лецтнеманзо . Мезентькак эзизе нарда шкась авань пряудеместэнзэ, кеместэ весе тосо ашти. Лиясто сонсензэ велень ломантне лоткильть ваксозонзо, зярдо бабинесь аштиль озадо кудонзо икеле, ды ушодыльть кевкстнемензэ. Кевкстнематне эрильть эрьва кодат. Ванок, кона ломаненть стувтылизь кулома шканзо, конань чачома иензэ. Лиясто савиль аванень ёвтнемс, кие кинень ды кода сави малавиксэкс велесэнть. Велень ломантне истя мерильтькак:"Эряви Романовнань кевкстемс". Сыредсь, сыредсь авам. Ванан, кода сон састыне эскельди монь ёнов. Озась монь каршо. Кода парсте аштетянок ават-тейтерть столекштне! Лоткак, шка! Кадык седе куватьс эрить минек лембе потмоёжонок, зярдо кавто сехте малавикс ломанть вейсэ! Содан, а лотки шкась. Сон а жали минек зярдояк: куроксто чии уцяскав шкасто ды вийсэ шаштови нусманя читнестэ. Ванан авань лангс. Сон мизолдозевсь, прякатнень лангс ванозь, ды монень неявсь, лицязо валакадсь, теке одксомсь. Пек вечки авам, зярдо мон панян прякат. Истя мерияк: "Кодамо таргочи прякавтомо?" - Авай, чумом нолдык. Течи прякатне ламбамсто.. таго мекс нузялгадынь. - Вай! Истя мезть тейнят? Ламбамсто ды берять? Пазонь кежть иля савтне, тейтерем. Авань сельмензэ пешкедсть сельведте. Пек сон монень маряви жаль истят шкатнестэ! Теке пшти пеель седеень ланга сонзэ сельведензэ. Стака умаресь кевери кирьга парезэнь ды а туи а тей, а тов. Ансяк аволь монь вийсэ витнемс авань одксчинзэ ды весе эрямопингензэ. Лецтнематнень а нардасы. Ват нейгак монь ламбамсто прякан сынст токадизь. Учан. Ней авам карми ёвтнеме седе, мезесь талакавтызе сонзэ седеензэ. - Мерят, ламбамсто прякатне?... Ютыль 1943 ие. Филянь ансяк саизь торпингев (войнав) . Авам а муиль тарка. Кудось Филявтомо чамсь. Марявиль, панжови кенкшесь ды марясынек сонзэ гайгев вайгелензэ: "Авай, Лиза, мекс нусмакадыде? Ват, мон сынь! Таргадо пси ям каштотсто, пекем вачсь!" Чистэ чис тонавтнинек Филявтомо эрямо, карминек учомо пельдензэ сёрмат. Учовсь васенце сёрмазо! Сон сась Маринь масторонь Сурок станциясто . Тосо Филянь пель ие тонавтсть улемс артиллеристэкс.. Валске, зярдо мон стинь, неинь ансяк каштотсто таргазь кавто лист ламбамсто ичезь сюкоркинеть. Монень марявсь, те таго кодамо тамашакс. Торпингень шкава эринек пек стакасто, савиль тантеенть варштнемс аламонь-аламонь. Те кода авам истя апак арсе тейсь? Эзь кемеве монень. Эрзятне свал мерильть тень кувалма: "Вейке чинь ломань! "-Авай, ков зяро сюкорот панить?"- пшкадинь тензэ Пек талакавтымим авань ёвтамозо. - Филя пек сынст вечксынзе. Истя чиде чис авам кармась панеме сюкоркетнень ды костямост. Кости эйсэст ды вачки мешокс. Тетям фатясь ды кевкстни авань: "Анна, мезекс таштат сюкоротнень? "Филянень," - нурькинестэ ёвтась авам. - Филянень? Тон превсэть? Филянь самс сынь кувсониить. - Арась, Роман. А кувсонить . Тон сынст усксы ней Филянень. Маринь масторось а истя уш васоло минденек. -Вай, Анна! Кодамо лезэсь неть сюкоротнеде Филянень? Таго тон арсят, сон ськамонзо карми ярсамо тонть сюкородонт. Мон 25 иеть ульнинь армиясо. Кавто торпингеть ютавтынь. Тосо, Анна, ськамот а ярсат. Паряк, вейке сюкоронь кис ардомс Маринь масторов? Тетям варштась авань лангс. Сонзэ сельведензэ ульнесть уш маласо. -Кода тон, Роман, а чарькодят? Секс уш мерить:"Авань седей лепень, тетянь седей тумонь". Тевесь а сюкоротнесэ. Нама, Филя сынст явшесынзе ялганстэнь. Мон лиякс а арсянгак. Монь мелем кенярдовтомс сонзэ тынк вастомасонк. Арсян, пек тошнакадсь цёрам тиринь масторонзо ды минек мельга. Ардт, Роман, варштык Филянь ды уск монень сонзэ пельде лембечи. - Паро, Анна. Молян , усксынь казненть. Чарькудитинь мон тонть парсте. Зярдо авань мешоксо пешкедсь сюкородо, тетям тусь сынст ускомо Маринь масторов. Нама, авам оштё лияткак казнеть пурнась.мартонзо. Карминек авань марто чиде чис учомо тетянь кудов велявтоманть. Учинек пек. Содылинек тетям уски Филядо ёвтнемат. Сынь миненек сестэ ульнесть весемеде питнейть. Весть валске мон сыргозинь авань ды тетянь кортнемастень. Тетям сась кудов! Прям теи удыкс, кунсолан тетянь валонзо. - Тон мерят, Анна, тетянь седеесь тумонь? Арась. Эзь кирде тумонсеськак. Неевлить, Анна, сынст сельмест! Допрок оштё эйкакшт! Кода сынь кенярдсть сюкоротнес, теке эрьватантень кучизэ сонсензэ авазо! Ды кодат ульнесть уцяскавт сельмензэ минек Филянь, зярдо сон каванясь ялгасонзо! А стяко мон якинь, а стяко! Сюкпря тонеть превень путомань кис. Авам кунсолось ды сельведензэ турсо чудсть сельмстэнзэ. Сон эзь кекше сынст эйсэ ды эзь нартне. Салава, прянь тавадозь , авардинь монгак.......Вальма ало моразевсь таго кодамо нармунь. Сон минек, теке велявтымизь неинь шкатнес васолоньсетнестэ. Стакат лецтнематне. Сынь а кадыть авань эйсэ. Торпингесь кеместэ озась сонзэ седейс, саизе вейкине вечкевикс лелянзо.. Эзизе стувто авам те кажонть. Сон свал юты сонзэ марто кувака эрямопингень кияванзо. Ютыть 20, 40, 50, 60 иеть торпингеде мейле. Авань сельведензэ таго кармить чудеме лелянзэ лецтнемстэ. Мон, лиясто вайгелень кепедезь, пшкадилинь тензэ:" Авай, зяро шка ютась! Саты уш теть авардемс." Ней, зярдо авам арась, монсень чумом а нолдан неть валтнэнь кис.

Просмотрено: 0%
Просмотрено: 0%
Скачать материал
Скачать материал

Найдите материал к любому уроку, указав свой предмет (категорию), класс, учебник и тему:

5 499 712 материалов в базе

Скачать материал

Другие материалы

Вам будут интересны эти курсы:

Оставьте свой комментарий

Авторизуйтесь, чтобы задавать вопросы.

  • Скачать материал
    • 19.03.2018 245
    • DOCX 38 кбайт
    • Оцените материал:
  • Настоящий материал опубликован пользователем Темаева Анна Фёдоровна. Инфоурок является информационным посредником и предоставляет пользователям возможность размещать на сайте методические материалы. Всю ответственность за опубликованные материалы, содержащиеся в них сведения, а также за соблюдение авторских прав несут пользователи, загрузившие материал на сайт

    Если Вы считаете, что материал нарушает авторские права либо по каким-то другим причинам должен быть удален с сайта, Вы можете оставить жалобу на материал.

    Пожаловаться на материал
  • Автор материала

    Темаева Анна Фёдоровна
    Темаева Анна Фёдоровна
    • На сайте: 6 лет и 2 месяца
    • Подписчики: 0
    • Всего просмотров: 23130
    • Всего материалов: 31