Тәрбие сағатының тақырыбы: Ардақтайық ананы!
Тәрбие сағатының мақсаты: Оқушыларды аналарын құрметтеуге, сыйлауға тәрбиелеу. Адамгершілік қасиеттерін қалыптастыру, ой -өрістерін, тілдерін дамыту.
Тәрбие сағатының түрі: топ арасындағы сайыс.
Көрнекілігі: Суреттер, нақыл сөздер, мақал – мәтелдер.
Тәрбие сағатының өту барысы: ұйымдастыру кезеңі.
Жоспары:
І «Мерекең құтты болсын, аяулы анашым» (оқушылардың аналарын құттықтауы)
ІІ «Жеңісім - анама» (топтар арасындағы сайыс)
Кіріспе:
Мұғалім:
Саған жарық сыйлаған кім?
Жылатуға қимаған кім?
Жөргегіңді ауыстырып, құндақтап,
Сен деп жанын қинаған кім?
Сен ауырсаң жүдеген кім?
Күдігі тез үдеген кім?
Айыққанша, қосылғанша қатарға,
Тілеуіңді тілеген кім?
Қателессең кешірген кім?
Жан дүниеңді түсінген кім?
Бесіктегі іңгәлаған кезіңнен
Ақ сүт беріп өсірген кім?
Оқушылыр:- Анам!
- Ендеше, балалар, бүгінгі біздің «Ардақтайық ананы!» атты тәрбие сағаты, сендердің мына отырған аяулы аналарыңа арналады.
Көктеммен бірге, көктемнің ең тамаша, ең әдемі, сұлулықпен, нәзіктіктің мерекесі – 8 наурыз Халықаралық әйелдер күні, аналар мерекесі де келіп жетті. Сондықтан ардақты аналар, ұстаздар, сүйкімді қыздар сіздерді мерекелеріңізбен құттықтап, өмірдегі бар жақсылықтарды тілеймін!
Ең бірінші ана керек балаға,
Ақ аналар, жүріңдерші аман! - деп тәрбие сағатын бастаймыз.(Өту жоспарымен таныстыру)
І бөлім.(Оқушылар аналарын құттықтап өлеңдерін арнайды)
1 – оқушы:
Біз ғана емес,
Қадыр тұтқан бабалар.
Аналардан туған небір даналар.
Ана деген – тіршіліктің тірегі
Армысыздар, қасиетті аналар!
2 – оқушы:
Шуақты көктем келді гүлін алып,
Көктемнің мерекесі бүгін анық.
Өмірдің көктемі де, гүлі – аналар,
Ана деп бас иеді күллі халық.
(Оқушылар бастарын иіп, аналарына еңбек сабағында дайындағын сыйлықтарын ұсынады)
Е. Хасанғалиевтің «Анаға сәлем» әні орындалады.
ІІ бөлім.«Жеңісім – анама» сайыс.
Жоспары:
Топты таныстыру.
Сұрақ – жауап
Өнер сайысы.
Тосын сұрақ (тығырықтан шығу)
Сөз құрау
Мақал – мәтел сайысы
Әділ қазы сайлау.
Топты таныстыру. (1 – ші топ өзін таныстырып, сәлемдеседі).
Топ жетекшісі: Біздің топ – «Тапқырлар»
Ұраны – «Тереңірек ойлаймыз, таппай бәрін қоймаймыз!»
Сайыс туын нық ұстап қолымызға,
«Тапқырлар» деп ат қойдық тобымызға
Сұрақтарға жауап беріп, ән де айтамыз,
Қыдыр ата жар болсын жолымызға.
Сәлемдесу:
Бермейміз қолымыздан намыс туын,
Ақтаймыз анамыздың артқан жүгін
Баршаңызға жолдаймыз ыстық сәлем,
Әділетті болар деп сайыс бүгін
(2 – топ өзін таныстырып, сәлемдеседі)
Топ жетекшісі: Біздің топ – «Алғырлар»
Ұраны – «Сайысқа әркез жараймыз, алғырлықты қалаймыз»
«Алғырлар» деп неге атадық тобымызды ?
Деген сауал мазалар бойыңызды
«Алғыр» болсаң сайыста жеңерміз деп,
Саралап, қортып шықтық ойымызды.
Сәлемдесу:
Уа, халайық, халайық!
Бәріңе жар салайық
Алғырлар тобы алда болмыз деп, баршаңызға
Сәлем жолдап, келіп тұр, ортамызға
Мұғалім: Құрметтейік, ата – ана, халқымызды,
Шығарайық бар әлемге даңқымызды
Әрқашан береке – бірлікте боп,
Ұмытпайық ата – дәстүр салтымызды,- дей келе салт – дәстүрге байланысты сұрақтарға жауап берейік.
Сұрақ – жауап. (Карточка түрінде берілген сұрақтарды таңдап алып, жауап береді)
№1. Қазақтың ұлттық ойындарын атаңдар.
№1. Қазақтың ұлттық киімдерін атаңдар.
№2. Жас сәби дүниеге келгеннен кейін жасалатын қандай салт – дәстүрлерді білесіңдер?
№2. Үйлену тойында жасалатын қадай салт – дәстүрлері білесіңдер?
№3. Қазақ қыста жейтін малының етін не деп атайды?
№3. Қымыз қай малдың сүтінен жасалады?
№4. Анаңның мінезін сипаттап бер.
№4. Анаңның келбетін сипаттап бер.
Мұғалім: Қазақтың жас – кәрісі өле - өлгенше,
Самарқау тұра алмайды өнер десе.
Ендеше өнерлі ұл-қыздарды қарсы алайық,
Құрметтеп, қошеметтеп қол соғайық, - деп, өнер сайысына кезек береміз.
Әр топ өз өнерлерін көрсетеді.
Жағдаяттан шығу.
І топқа: Бүгін сенің анаңның туған күні болатын. Сен оны құттықтауды ұмытып, сабаққа кетіп қалдың. Сабақтан келсең, анаң көңілсіз. Анаңның туған күні екені есіңе түсті, не істейсің?Анаңды қалай қуантасың?
ІІ топқа: 8 – наурыз мерекесі күні кішкентай Айдос анасына фотоальбом сыйлады. Анасы сыйлыққа ақшаны әкесінен алды деп ойлады, бірақ әкесі ақша бермеген еді. Айдос ақшаны қайдан алды деп ойлайсың? Егер сен Айдостың орнында болсаң, ақшаны қайдан алар едің?
5.«Ойлан тап» «Мерекеңізбен» сөзінен берілген уақытта басқа сөздер құрау. Топ мүшелері ақылдаса отырып жазып, оқиды.(Мысалы: мереке, із, мекен, біз т.б)
Мұғалім: Қастерлеп бабалардың дара үнін
Әр сөзінен өзіме алам үлгі.
Ендігі сәт әр топ мақал айтсын
Дәріптеп қазағымның даналығын.
6.Ана туралы мақал – мәтел айту сайысы.
Қорытынды. Сайыс қорытындысын жариялау үшін, сөз әділ қазылар алқасына беріледі.(Топтарды марапаттайды). Аналар балаларына тілектерін арнайды.
Мұғалім: Ана мейірі күн көзімен пара – пар,
Тұла бойға қуат болып таралар.
Өміріме шуақ шашып әрқашан,
Көп жасаңдар ақ ниетті аналар!
Хор: «Әрқашан күн сөнбесін» әні
Оставьте свой комментарий
Авторизуйтесь, чтобы задавать вопросы.